Isla Paraiso - Gula 66

“Ug kinsa may magbuot kanako?” nagkanayon ang koronel. “Ako si Col. Martin Villadar. Koronel ako, nalimot ka ba niana, SPO3 Rey Corpuz?”“

“Wala ako malimot niana, Sir. Apan nasayod sab ako nga may limitasyon ang function sa matag katungdanan.”

Niining tungora, si Capt. Benale mitindog gikan sa gilingkoran niining swivel chair ug miduol sa duha nga ingon sa nagkainitay na ang panaglalis.

“Husto na kana, Corpuz,” mibadlong ang kapitan.

“Disiplinaha kanang sakop mo, Benale,” ug mipaturatoy na paglakaw ang koronel.

Sa dihang layo na si Col. Villadar.

“Kaganina ka ra ba dinhi sa luyo sa pultahan?” Gisukot si Rey ni Capt. Sancho Benale.

Yango ray gitubag ni Rey.

“Kun mao nabati mo ang tanan namong gipanagsultihan bahin kanimo?”

“Yes, Sir.”

“Timan-i kini, Rey. Dugay na akong nagduda sa Koronel. Wala ko lang kini isulti dayon kaninyo tungod sa kakulang sa ebidensiya ug ilabi na usab kay taas siya nga opisyal sa kapolisan. Ug mat-an pa sa pinya si Col. Villadar. Dili niya maabot ang iyang posisyon karon kun dili pa siya utokan,” matud ni Capt. Benale. -- Sumpayan pa