Paregla sa Sinulog

Abtik nga miuliot paglakaw si Pons sa nagdasok nga mga tawo daplin sa dalan nga maoy giagian sa rota sa tanang contingents nga misalmot sa Sinulog Festival ug sa nagkadaiyang mga floats ug higante nga nakalingaw sa tumatan-aw sa matag atbang nga daplin sa dalan.

Ang mga mananayaw sa Sinulog sa matag partisipante, lanog kaayo ang singgit, samtang nagwarawara sa gikuptan nga imahen ni Senyor Santo Niño. Ang mga tambol sa dram ug biyugol nga nag-una sa matag contingents, mipalanog usab sa lagubo ug taliis nilang mga huni sa kadalanan.

Miliraw ang panan-aw ni Pons sa atbang. Nalantawan man god niya kaganiha sila si Gal ug Rael, iyang kauban sa fraternity, nga nagpangamay niya sa atbang ug misenyas nga mag-inom sila og beer nga ilimnon.

Nakahukom man unta siya nga dili na moinom og makahubog nga ilimnon ning adlaw sa Sinulog nga maoy kapistahan ni Senyor Santo Niño, kay basin og makabagat siya’g laing grupo sa karibal nga fraternity.

Dali ra nga moinit ang iyang ulo, basta makainom siya’g ilimnong makahubog, ilabi na kun mahubog na gyud siya. Kanunay siyang tambagan sa iyang Papa Cesar ug Mama Nila, ang negosyante niyang mga ginikanan nga suplayer og karne sa mga dagkong restawran ug hotel dinhi sa siyudad.

“Bugtong ka namong anak, Pons! Busa pagtinarong sa imong pag-eskuyla sa kolehiyo! Nabatian namong nahilig kas barkada ug inom sa beer ug bino....!” pahimangno sa iyang  Papa Cesar.

“Hunong na nianang imong pagbugoybugoy ug pagpakigbarkada sa gisudlan mong fraternity....!” dason usab sa iyang Mama Nila, nga pulos lang gipalapos ni Pons sa pikas niyang dunggan.

Sa dihang molabang na unta si Pons sa atbang nga dalan aron sa paglusot sa nanagsayaw og Sinulog sa dalan, kalit nga may mihawid sa iyang tuong kamot. Usa ka batang lalake ang nasugat sa iyang panan-aw nga nagpahiyom kaniya.

“Ayaw na’g labang, Kuya! Pasagdi tong duha mo ka kauban nga mag-inom-inom og binong makahubog. Sinulog ron, kuyaw sa paregla...!”

“Ayaw ko’g kupti, Dong....!” gibati’g kapikal si Pons nga miwakli sa kamot sa batang lalake nga kusganong mihawid kaniya.

“Duna ko’y bawon! Imo na ni, Kuya, may sulod kining sobre!” sa bata nga mitunol kang Pons sa kape nga gamay’ng sobre.

“U-unsay sulod ning sobre...?” ni Pons nga midawat sa kapeng sobre.

“Duha ka nanampiling nga Ninoy, Kuya! Ayaw na’g tipon sa duha mo ka barkada! Pauli sa inyo ug didto na lang ka mag-inom sa inyong balay!”

Nahunong si Pons sa pagpakigsulti sa batang lalake, dihang nagkaguliyang sa atbang dalan. Paglingi ni Pons, wala na sa  iyang kilid ang batang lalake. Nagkagubot gihapon sa atbang, samtang padayon nga nagsayaw ang miyembro sa contingents sa ilang pagsinulog sa tunga sa dalan. May lanog nga sininggitay sa atbang  nga dalan.

“May gipareglahan! May nadunggaban...!”

Bitbit ang sobre, nakuryoso si Pons nga miuliot gyud paglabang sa atbang. Ug maoy nasugat sa iyang panan-aw sila si Gal ug Rael nga giyayungan sa mga polis ug mga barangay tanod nga naligo sa daghang dugo kay gipareglahan sa karibal nga fraternity.

Nahiugbok si Pons sa iyang gitindogan nga nagkupot gihapon sa sobreng gihatag sa bata. Kun dili pa sa maong bata nga mipugong kaniya ganiha sa paglabang, lagmit maapil siya nga mapareglahan uban nilang Gal ug Rael.

Nahatutok si Pons  sa kilid sa kapeng sobre nga may larawan ni Senyor Santo Niño  nga kamay-ong gayud diay niadtong bata nga mihawid kaniya ug mihatag ning sobre nga may sulod nga duha ka nanampiling Ninoy nga kuwarta. (Kataposan)