Isla Paraiso

Gula 65

“Aw, kun gusto ka, Sir,” matud ni Capt. Benale ngadto ni Col. Villadar,”  nganong dili mo man sultihan si Corpuz? Total, mas taas ka nga opisyal kay kanako?”

“Ayaw ako’g tudloi sa angay kong buhaton, Captain!”

“I’m sorry, Sir?”

“Punyeta!”

Ug gitalikdan na sa koronel ang kapitan. Mipadayugdog kini paingon sa pultahan. Apan napahunong siya pagkakita kang Rey Corpuz nga nagbarog tungod sa pultahan. Nagkasugat ang ilang mga mata. Hait kaayo ang tinan-awan niini kang Rey.

“Unsay imong gibuhat dinhi?” Nangutana ang koronel.

“May tuyo ako kang Capt. Benale mao nga gihulat ko nga mogawas ka, Sir,” laktod nga tubag ni Rey.

“May tuyo ka sa kapitan o namati ka sa among gipanagsultihan?”

“Kun namati man ako sa inyong gipanagsultihan, may daotan ba niana, Sir?”

“Punyeta ka! Ayaw ako tubaga’g sama niana. Nalimot ka ba kun kinsa kining imong gikaatubang? Wala kay tahod kanako!”

“I’m sorry, Sir. Apan sa akong tan-aw, mora’g dili ka sab angay tahuron sa imong gipakitang batasan sulod sa buhatan ni Capt. Benale kaganina. Misulod ka sa dili imong buhatan unya ikaw na hinuon ang taas kaayo’g tingog?” -- Sumpayan pa