Anak sa dinakpan

Gula 6

Namili og ilang mapalit sila si Regner ug Zeny didto sa ladies department. Gipalitan ni Regner si Zeny sa nagustohan niini nga T-shirts. “Hala maikog ko nimo Regner uy, mahalon man kining maong mga t-shirts,” ni Zeny.

“Wala’y problema Zen, may subra pa man ko sa bonus nako sa City Hall,” matud ni Regner nga nagngisi. Mipalit usab si Regner og iyang T-shirt nga si Zeny usab ang mipili. Pulos g’yud mga branded T-shirt ang ila nga gipalit.

Nangaon usa sila sa Food Court didto sa ikaunom nga andana sa Metro Gaisano sa wala pa ihatud ni Regner si Zeny didto sa ilang balay.

Alas kwatro na sa hapon sa ilang pag-abot. Nakabantay si Regner nga wala gayud siya makakita sa inahan sa dalaga sukad pa kaganina sa iyang pag-abut sa udto.

Iyang gipangutana si Zeny kabahin niini ug gitug-anan nga tua diay sa Argao ang iyang inahan ug ugma pa kini sa hapon mopauli. “Mangaligo pa kuno sila sa dagat ugma kay Domingo man,” ni Zeny pa.

Misulod si Zeny sa iyang kwarto. Paggawas niini nagsul-ob na sa bag-ong pinalit nila nga T-shirt. “Wow, kaangayan nimo Zeny! Gwapa ka kaayo tan-awon nianang mao nga T-shirt nga may borda nga design sa dughan,” matud ni Regner.

Mibathay gayud sa panagway ni Zeny ang kalipay. “First time pa g’yud ko nakasul-ob og ingon niini ka mahal nga t-shirt Regner. Kanunay ra man tawon ko magmantinil gani og ukay-ukay,” ni Zeny pa.

Nahilom sila’g kadiyot. “Ngano diay nga nakahuna-huna ka man nga palitan ko nimo’g T-shirts?” sa dalaga pa nga mitutok kang Regner.

“Number 1, birthday nimo sa Lunes, ikaduha pinangga tika Zen, I feel in love with you bisan sa kamubo pa sa panahon sa atong panagkaila,” daw nangamural na si Regner kang Zeny.

Wala gayud makatingog si Zeny nga nakadungog sa gisulti ni Regner. Mora siya’g natuk-an. Miginhawa’g lawom si Zeny apan paraygon ang iyang tinan-awan ngadto sa traffic enforcer.

“I love you Zen,” kalma na ang sinultihan ni Regner. Gitutokan niya ang nindot ug porma kaayo nga lawas ni Zeny nga nagsul-ob sa nindot kaayo nga T-shirt nga iyang gipalit.

Wala mag-usik og panahon si Regner. Gigunitan niya ang suwang sa dalaga. Wala usab mukibo si Zeny nga paraygon kaayo’g tinan-awan ngadto sa traffic enforcer.

Anam-anam nga gipaduol ni Regner ang iyang mga ngabil ngadto sa mga ngabil ni Zeny. Sa unang higayon nagdapat ang ilang masi’g ka mga ngabil.

Gidimdim ni Regner ang katam-is sa mga ngabil ni Zeny nga wala na magtingog. - Sumpayan