Anak sa dinakpan

Gula 4

Hapit na lang mogakus kang Regner ang amahan ni Zeny tungod sa kalipay nga gilukat niini ang iyang driver’s license gikan sa LTO. Wala usab malilong sa amahan ni Zeny nga mihatag ang traffic enforcer og kuwarta sa iyang anak nga gipalit nila og bugas dihang wala pa siya’y kinitaan.

"Gibisitahan ra nako si Zeny kay day-off man 'sab nako karon," giingnan ni Regner ang PUJ driver nga amahan sa dalaga. Miyango-yango ang amahan ni Zeny nga nagpahiyom. "Walay problema Sir. Welcome ka g'yud kanunay diri sa among balay," matud ni Nestor nga amahan sa dalaga.

Gipapalitan ni Nestor ang traffic enforcer og softdrinks sa duol nga tindahan. Human makapaniudto si Nestor, wala na kini magdugay kay mopadayon na sa pagpamasahero. "Biyaan ko lang ikaw diri sir ha? Unsaon mangita pa ko'g kuwarta kay birthday ra ba ni Zeny sa sunod adlaw basin makapalit ko'g usa ka kilo nga karne nga maluto," ni Nestor pa.

Paglakaw na ni Nestor, gipahiyoman ni Regner si Zeny. "Birthday diay nimo sa sunod adlaw? Advance happy birthday diay," ni Regner pa nga mitunol sa iyang kamot. Mibawos pagpahiyom si Zeny ug mitug-an nga gipasidan-an na siya sa iyang amahan nga posible nga wala sila'y hikay sa iyang birthday.

"Pwede ba og makigpanuroy ko nimo karon Zen? Anha ra kita sa department store sa downtown kay hatagan ko ikaw og binirtdihan nga bag-ong sinena," giingnan ni Regner ang dalaga. "Ha? Tinuod ka Regner?"

Daw dili makatoo si Zeny sa iyang nadungog gikan sa traffic enforcer. Tuod, abtik kaayo nga nag-ilis og sapot si Zeny. "Magmotor lang ta Zen kay aron madali ta," matud ni Regner.

Samtang nagsunod sila si Regner sa usa ka PUJ, kalit nga mipahunong ang drayber sa PUJ ug hinungdan nga kalit kaayo ang pagpreno ni Regner. Wala tuyoa nga nadusmo si Zeny ngadto sa buko-buko sa ulitawo ug napagakus kang Regner aron dili siya matagak.

"Sori kaayo Regner ha?"ni Zeny pa nga pwerteng nakapangayo'g pasaylo. "Wala kay sala uy. Kanindot ba kun magsige og ingon adto kay aron modikit ka paggakus nako Zen," matud ni Regner nga mihimo'g sagol-komedya.

Nalipay si Zeny nga wala diay masuko kaniya si Regner. "Ang maayo Zen, gakus na lang daan nako kay aron nga dili ka mahulog," giingnan sa traffic enforcer si Zeny. Nakasiguro na si Regner nga nakagusto siya kang Zeny.

Nanulod sila sa department store. Girombo dayon nila ang ladies wear department aron mamili og sinena para ni Zeny. - Sumpayan