Pinangga ni Senyor Santo Niño

Daw gibati og kangilo sa iyang tibuok kalawasan si Ador nga kauban ni Elesa nga iyang asawa nga nagtan-aw sa natagak nga kampana sa simbahan sa  Basilica   del  Santo Niño pipila ka takna ang nakalabay human sa nahitabong 7.2 magnitude nga linog.

Mipaingon ang iyang asawa sa dagkotanan sa pagdagkot og kandila samtang si Ador nagpabilin lamang sa nahimutangan sa natagak nga kampana sa simbahan.

Wala siya makasabot sa iyang gibati nga nagtan-aw kauban sa daghang mga tawo nga nagtapok  nga ang kadaghanan kanila magpanglingo sa ilang ulo nga daw gianugonan o dili makatuo sa maong nahitabo.

“Pastilan no,”  sa hamtong pa nga lalaki ngadto sa iyang kaubang babaye. “Kun  naatol pa nga dunay misa sa paglinog  may madat-ugan man gyod tingali.” “Unsa kahay hitsura sa tawo kun madat-ugan ana no?” diha’y mitimang nga batan-ong lalaki.”

“Aw, unsa pa di mapisat gyod,”  mitubag usab ang kuyog niini nga laing batan-ong lalaki. “Dili mahitsura ang tawo nga madat-ugan sa pagkatagak kay bug-at man na.”

Ang gipanagsultian sa mga tawo nga nagtapok mao usab ang diha sa hunahuna ni Ador nga maoy hinungdan nga daw gingilohan siyang nagtan-aw sa kampana nga nahagsa.

Nagtrabaho  sa buhatan sa goberno si  Ador ug  magtutudlo usab ang iyang asawa sa publikong tulunghaan nga maoy hinungdan nga pulos sila walay trabaho niadtong higayona kay holiday man ang maong adlaw.

 Naandan na nila ni Ador ug sa iyang asawa nga human sa ilang pamahaw sa mga adlaw nga walay trabaho sa paghapit una sa simbahan  sa Santo Niño sa pagdagkot og kandila sa  dili pa moadto sa Carbon alang sa ilang pagpangumpra.

Sa matag higayon nga manimba sila ug sa iyang asawa sa maong simbahan ang dapit nga nahagbongan sa kampana mao usab ang sagad niyang estambayan nga magsandig sa kilid sa gikoral nga kabilya.

Niadtong buntaga mao usab unta gihapon ang iyang buhaton ang pagbarogbarog sa maong dapit samtang magpaabot sa iyang asawa nga moadto sa dagkotanan sa  pagdagkot og kandila apan nalangan lamang sila sa ilang paglakaw tungod kay dugay man moandar ang makina sa  sakyanan nga multicab nga daw nabugnawan ang makina.

Samtang nagdagan ang gimaneho niyang multicab maoy namatikdan ni Ador nga daw nag-ikis-ikis na ang dagan nga maoy hinungdan sa iyang pagpadaplin ug mipahunong  sa pagtuo nga adunay kakulian iyang manobela ug namatikdan na lamang ang kusog kaayong pagtay-og sa linog. Malingaw  si Ador nga magbarogbarog sa maong dapit sa panahon sa  pagsimba kuyog sa iyang asawa tungod kay makita man niya ang mga seksi ug bigot nga lawas sa mga babaye nga magbarog sa iyang atubangan o molabay sa maong dapit nga iyang nahimutangan.

Sa mga higayon nga magmisa ang pari maoy himoon ni Ador ang pagpaliraw sa iyang mata sa palibot sa pagpangita og seksi nga babaye nga maoy iyang kalingawan sa iyang mga mata sa pagtan-aw niini.

“Hoy,” ni Elesa pa nga misiko sa kilid ni Ador usa ka higayon niana sa ilang pagsimba. “sabat pod diha, uy!”

“Ah, ha?” ni Ador pa nga daw nahaigking ug naputol ang pagtutok sa sampot sa nagbarog nga babaye nga diha sa iyang atubangan.”U-unsa toy pulong sa pari?” “Humana ang misa,” ni Elesa pa dayong lakaw paingon sa gawas alang na sa ilang pagpamauli.

“Kandila  mo Sir?” sa tigulang pa nga babaye nga namaligya og kandila nga miduol sa nagtapok nga mga tawo.

Nagpalit si Ador og kandila sa tigulang ug nagdali nga milakaw sa pag-apas sa iyang asawa sa dagkotanan  human mosantop sa iyang hunahuna nga pinangga gayod siya ni  Santo Niño ug angay  siya nga magpasalamat. (Katapusan)