Luha sa miaging tuig

Kun ato gayong sabton ug palandungon, ang Tuig 2013 maoy luha nga naghawid sa kinabuhing Pilipinhon. Daghan ang mga kalamidad ug trahedya nga natagamtam sa nasud. Lagmit di kini makalimtan sa mga Pilipino ilabi na niadtong sakop sa pamilya nga nabiktima sa masakit nga kasinatian.

Lagmit lab-as pa sa hunahuna ug kasingkasing natong tanan ang makaluluoy nga gidangatan sa mga pasahero sa dakong trahedya sa dagat sa kadagatan sa Talisay. Kinsa bay makalimot kanato sa mga pasahero sa barko sa 2GO Shipping nga nagtuo nga luwas silang mahidunggo sa piyer sa Cebu apan diay gisugat  sila sa kamatayon. Daghan kanila ang nangamatay, wa gayod nila damha nga modangat kini kanila.

Niining maong trahedya sa dagat hangtod karon nagluha pa ang mga mata sa mga biktima kay dili dali alang kanila ang paghikalimot niini.

Dugang pa gayong kasakit nga miabot sa taga Visayas kay ang lalawigan sa Bohol ug ang Cebu gitay-og sa kusog nga linog. Daghan ang imprastraktura ang naguba, apil na ang nahugnong mga edipisyo. Nangliki ang kadalanan, nahunlak ang mga tulay ug daghan usab ang mga kinabuhi nga nakalas. Dili lamang ang kinabuhi ang napunta sa pagkahanaw, kun dili apil na usab ang nagun-ob nga mga balay ug mga simbahan.

Ug sa naghinapos na ang Tuig 2013, laing bangis ug kusog nga bagyong Yolanda ang milampurnas ug mianod sa kabalayan ug linibong kinabuhi sa tawo ang naalaot. Ang Tacloban, Samar ug Amihanang dapit sa Cebu ang labaw nga nakaangkon og grabeng kadaot. Daghan uyamot ang gipanggutom ug giuhaw. Ang uban nalisoan sa pangisip. Aduna pay uban nga nanulis og mga pagkaon kay dili na maantos ang gibating kagutom. Hangtod karon, daghan pa sa mga nangamatay nga wala pa ikalubong ug nagpadayon pa sa pag-ihap sa dugang nga namatay. Ang uban wala pa tingali maugkat sa nahimutangan. Daghan ang nawad-an og kapuy-an.

Dugang giantos sa mga nabiktima sa maong katalagman mao ang walay hustong sistema sa pagpanghatag sa panabang gikan sa gobiyerno. Pagkapait sa gidangatan sa kaigsuonan natong mga Pilipino nga naigo sa maong mga trahedya ug kalamidad.

Ang Tuig 2013 gikaluhaan og mga luha. Unta, sa pagsulod karon sa Tuig 2014, kalipay, kaabunda ug kalinaw na ang moabot sa nasud nga Pilipino.