Si Kumare Jelyn - Gula 7

Nakapahiyom si Jelyn nga nakabawos siya sa kanhi niya boyfriend nga miayad na kaniya human siya magmabdos. Apan nasamok ang iyang huna-huna sa gisulti kaganina ni Jomar.

Giingnan ni Jomar ang iyang kanhi boyfriend nga aduna na sila’y relasyon ug nga kaslonon na silang duha bisan og dili kini tinuod. Lawom kaayo ang gihuna-huna ni Jelyn.

Nakabantay niini si Jomar nga kaganina ra nga nagpaniid kaniya. “Lyn, ingon sa lawom kaayo ang imong gihuna-huna. Nahigugma ka pa g’yud diay sa imong kanhi boyfriend,” kalma ang tingog ni Jomar.

“Aw, sory kaayo Mar. Wala, wala na ko’y gusto pa sa akong boyfriend. Gihuna-huna lang nako ang imong gisulti kaganina nga makapahimo nako nga kataw-anan,” ni Jelyn pa.

Nahauknol si Jomar pagkadungog niya sa gisulti sa dalaga. “Giingnan man gud nimo ang kanhi nako boyfriend nga kaslonon ta apan kay dili man tinuod, pag-abot sa panahon iya na usab ko nga kataw-an,” pasabot ni Jelyn.

Nakapahiyom si Jomar. “Aw, kana diay ang imong gihinuktokan Lyn? Ang tinuod, bisan og wala pa ko nimo sugta apan nasayud ko nga dili nimo ako pakyason,” matud ni Jomar.

Wala magtingog si Jelyn. “Kun sugton na ko nimo Lyn, tinuod ang akong gisulti, pakaslan ko ikaw ug ako maoy mangamahan sa bata nga imong gisabak,” dugang ni Jomar.

Mibathay pagkalit ang matam-is nga pahiyom sa panagway ni Jelyn ug napagakus siya kang Jomar. Nanggawas sila sa kan-anan. Nasigpatan ni Jelyn ang kanhi niya boyfriend nga naniid ra kanilang duha ni Jomar.

Gigakus ni Jelyn ang hawak ni Jomar sa ila na nga pagpanglakaw. Gituyo niya aron pagpasuya sa kanhi niya boyfriend.

Didto sulod sa awto ni Jomar sa parking area sa restaurant. “Asa man ta gikan dinhi Lyn?” gisukna ni Jomar ang dalaga. “Ikaw gud, bahala ka og asa ko nimo dad-a, pangasaw-on man kaha ko nimo?” ni Jelyn pa.

“Sure, pangasaw-on g’yud. Sige, tumani ko sa akong kagustohan Lyn ha?” matud ni Jomar nga mipatik dayon og hawok sa aping ni Jelyn ug miukob sa lumoy kaayo niini nga mga ngabil.

Gipadagan ni Jomar ang kotse ug rombo na nila nga adtoon ang usa ka mabugnaw nga lawak nga nahimutang sa Barangay Caretta aron adto sa unang higayon tagayon nila ang kalipay.

Sa ilang pagparayganay, nasuta ni Jomar nga birhen pa si Jelyn. Ingon sa dili siya makatoo kay giangkon na sa dalaga nga mabdos siya ug mao nga gibiyaan siya sa iyang boyfriend.

“Ang tinuod Mar, misugod siya paglikay nako kay wala ko mosugot nga dad-on ko niya sa motel.” 

“Aw mao ba? Pastilan, miingon man gani ko nga ako’y mokugos sa imong anak aron magkumare na ta,” ni Jomar pa nga nagngisi. - Kataposan