Sala sa amahan

Minghoy ang nawong ni Derek nga nisulod sa sala sa balay ni Edna iyang maguwang. Bag-o lang siyang niabot rong hapona gikan sa klinika sa dermatologist. Kay nibalik na sab ang kagid ug nuka ni Fe iyang panganay. Tulo ka bulan na ning sakit sa iyang anak. Dako na iyang gasto. Napatambalan na gani niya’g albularyo si Fe. Wa lang gihapon naayo.

Gikapoy na si Derek. Iyang gibilin si Fe sa iyang balay daplin sa baybayon. Ug nitungas siya nganhi sa balay sa maguwang aron sumbongan sa iyang kadismayo ug kabalaka.

“Basin baya’g nakasala ka. Unya imong anak ang gisilutan. Mas sakit ang bation sa amahan kun iyang anak ang maperhuwesyo sa kastigo nga angay unta sa amahan” ni Edna. Seryoso.

Daw natuk-an sa laway si Derek human sa iyang pagpanglab-ok. Nahatutok siya’g maayo sa iyang maguwang.

Drayber og taksi si Derek. Kinamanghuran siya sa duha ka managsoon. Balikbayan si Edna nga bag-o lang nabiyuda. Nipauli siya sa Pilipinas human sa bayente ka tuig nga panarbaho sa America. Iyang bana nga si Alfred, usa ka Amerkano. Igo lang nahuman og patukod sa ilang balay sa baryo Abulan, nitaliwan. Si Derek ang gibasol sa kamatayon ni Alfred.

Grabe ka bintahoso si Derek. Kun mouli sa Pilipinas si Edna ug iyang bana (wa man sila’y anak ug hapit kada tuig mouli) si Derek ang mahimo nilang drayber ug tour guide. Mokuha sila’g sakyanan sa rent-a-car. Suholan pa si Derek sa pagdrayeb, may cut pa siya sa overprice sa abang sa sakyanan.

Si Derek ang gipahimo og desinyo sa balay nga gipatukod. Kay may background man siya sa Civil Engineering. Wa lang kahuman. Nikabat og usa ka tuig ang pagtukod sa balay. Mora og mansiyon kadako. Nagbantaog ibabaw sa bakilid padulong sa baybay, ibabaw’g diyutay sa balay ni Derek. Singko milyones ang gasto. Sa nasapi ni Derek nakapalit dayon siya’g taksi nga brand new. Doble man iyang igo sa Amerkano. Materyales ug labor. May sweldo pa siya sa pag-supervise sa construction. May suhol pa siya sa pagdesinyo sa balay.

Pagkabisto niya sa Amerkano kay wa man kasabot sa kamahal sa suhol sa mga panday nga wa magsigo ang trabaho, gikasab-an siya’s langyaw nga bayaw. Deny to death siya. Mao pay maningka sa Amerkano. Sa kasuko ug kalagot sa langyaw, giatake sa kasingkasing. Nabiyuda’g di oras si Edna. Apan kay maguwang nga mapinanggaon sa manghod, nipasensiya lang. Bisa’g nasayod na siya’s anomaliya sa manghod. Kay ang mga panday nisulti niya nga katunga sa ilang suhol, iuli nila ngadtong Derek.

Class ug sosyal man god og lihok si Gina asawa ni Derek. Mahalon kaayo’g mga gamit sa panghindik ug pamostora. Bisa’g naa ras probinsya. Gasto kaayo’g load sa selpon ug sa facebook. Kay way oras nga di magpasundayag sa facebook.

Diyes anyos na si Fe. Grade four na siya. Brayit unta bataa. Kanunay matauran og ribbon. Ang manghod nga si Kevin, naa pa sa grade one. Brayit sab. Magpulipuli lang og kasakti ang duha ka bata.

“Sige, Manang. Ako pang kuhaon sa eskuylahan si Kevin” ni Derek dayong tindog. Niyango lang ang maguwang. Nanglantaw sa layo.

Sa gawas, nakapanglantaw sab sa halayo si Derek. Nakahinuktok og lawom. Ug nakahukom nga mobisita sa lubong sa iyang bayaw. Ipakita niya iyang pagbasol. Ug mangayo siya’g pasaylo. (Katapusan)