Si Kumare Jelyn

Gula 6

“Adto ta mangaon sa bag-ong kan-anan sa Salinas Drive,” giingnan ni Jomar si Jelyn. “Ikaw gud, ikaw man bitaw ang mobayad,” nagngisi si Lyn nga mitubag.

Pag-abot nila sa parking area sa kan-anan, wala dayon sila manganaug. Gilingi ni Jomar si Lyn nga diha sa iyang tupad. Mipahiyom si Lyn nga mitutok ‘sab kang Jomar.

“I love you Lyn,” matud ni Jomar ug anam-anam nga giagbayan niya ang dalaga. Wala makatingog ug wala masayud si Lyn kun unsay iyang itubag. Ang tinuod nakagusto siya kang Jomar apan mabdos siya sa anak nila ug sa iyang boyfriend.

Gihagkan siya ni Jomar ug giukoban ang mga ngabil. Mibawos usab si Jelyn ug daw gidimdim nila ang katam-is sa ilang tagsa-tagsa ka mga ngabil. “Dili ba diay ko nimo mahimong panggaon Lyn?” gisukna ni Jomar si Lyn.

“Ang tinuod, nakat-on na ako pagmahal nimo Mar, apan sayud ka baya nga mabdos na ko sa anak namo ug sa kanhi nako boyfriend,” pasabot ni Lyn.

“Nahigugma ka pa ba diay sa imong boyfriend?” matud ni Jomar. “Wala na,” pintok nga tubag ni Jelyn. Giukoban pag-usab ni Jomar ang mga ngabil sa dalaga kay nakasabot na siya nga nagpangikog lang si Lyn nga mosugot kaniya.

Gihapuhap ni Jomar sa unang higayon ang porma kaayo nga lawas ni Lyn. Taud-taud, nanulod sila sa kan-anan. Milingkud sila sa lamesa dapit sa kinadaplinan aron aduna sila’y privacy.

Adunay waiter nga nagpaingon sa ilang nahimutangan nga nagbitbit og Menu alang sa ilang order. Apan napasiga ang mga mata ni Jelyn. “Rolly?” gisangpit ni Jelyn ang waiter. Wala makatingog ang waiter. Pareho sila’ng duha nga daw nahimong amang.

“Mar, siya ang kanhi nako boyfriend, si Rolly,” gipaila ni Jelyn kang Jomar ang kanhi niya boyfriend nga milikay na kaniya human siya magmabdos.

“Aw siya diay. Walay problema kun gipalay-an ka na niya Lyn. Brod sweetheart ko na si Lyn ug nagkasabot na kami nga magpakasal. Gikasabotan na usab namo nga ako ang mangamahan sa iyang gisabak,” matud ni Jomar.

Daw napasiga ang mga mata ni Lyn nga nakalitan sa iyang nadungog. Ang tinuod wala gayud sila magkasabot kabahin niini si Jomar kay wala pa gani niya kini gisugot.

Abtik nga mibiya ang waiter nga wala na mohuwat sa order nila ni Jomar ug Lyn. Lain na nga waiter ang miduol ug mikuha sa ilang order. Wala makasabot si Lyn sa iyang gibati.

“Nakabawos ka na Lyn sa imong kanhi boyfriend. Nasayud ko nga gisakitan siya nga nagtan-aw nga may lain ka na nga kuyog ug imong bag-ong boyfriend,” ni Jomar. -Sumpayan