Isla Paraiso

Gula 55

Apan ingon sa maglisod si sister Veronica sa paglikay kang Rey. Nakatultol kini sa kombento ug bisan iya pa kining did-an dili gayod kini mopatuo. Naikog na sab siya sa mga kauban niyang madre sa kombento nga nakamatikod sa masubsob nga pagduaw ni Rey sa Orchids Sisters Convent. Apan si Rey nga ingon sa nakatimaho gilayon sa iyang paglikay mihimo gilayon og lakang aron magkasulti sila. Karon unsay iyang buhaton? Mosanong ba siya sa gihangyo nga pabor niini?

May kabalaka nga kalit kaayo nga milabok sa alimpatakan ni sister Veronica. Kun ihatag niya ang pabor nga gihangyo ni Rey, dili ba kaha kini lainon pagsabot sa lalaki ug magtuo na unya kini nga siya may hilom nga pagmahal niini ug dili siya gusto nga mabugto sa hingpit ang ilang komunikasyon? Lisod na kaayo kun mao kini moturok sa hunahuna ni Rey. Mosamot unya hinuon kadako ang iyang problema ngadto sa lalaki nga nangulitawo kaniya.

“Tubaga na ako, sister Veronica,” nagkanayon si Rey nga misikdo sa iyang kahimungawong.

Naigking si sister Veronica. Wala tuyoa nga napantok ang iyang panan-aw sa relo nga naggakos sa iyang pulso. Hapit na ang ikaala una sa kaadlawon. Daling misantop sa iyang hunahuna nga kinahanglang makapauli na si Rey.

“Okey,” ni sister Veronica. -- Sumpayan pa