Alas siyete sa buntag. Namisibis pa sa iyang mga halaman sa hardin atubangan sa iyang balay, si Sonia. Unya niagi sa tungod sa ilang gate atubangan sa karsada si Carlo nga nagbitbit og binugha nga kahoy. Iyang balay tua sa luyo sa ilang Sonia. Kun mobiya si Carlo sa ilang balay o mopauli, muagi gyud sa atubangan sa gate sa balay ni Sonia, ug sa kasadpang habig sa balay sa naulahi.
Magbilas si Sonia ug Carlo. Kay ang asawa ni Carlo nga si Tina, manghod ni Paul, bana ni Sonia. Apan bag-o lang nahusay (wa pay semana) ang away nilang Carlo ug Paul, nga hapit nagbinunalay.
Maong nakugang si Sonia nga nagbitbit og bunal si Carlo. Kada buntag siyang mag-hike. Ug karon lang nakita ni Sonia nga nagdala’g bunal si Carlo gikang nag-hike. Nagduda siya nga may kasuko pa si Carlo ni Paul. O kaha may kahadlok pa siya nga awayon ni Paul inig agi’s duol sa ilang balay.
“Nganong nagdala ka ma’g bunal, Carl?†ni Sonia pagdayong liko ni Carlo subay sa kasadpang habig sa iyang balay. Niurong si Carlo sa iyang lakang. Nitutok pag-ayo ni Sonia.
“Pasensiya ka na nga nangutana ko. Kay ikaw ra man say nag-ingon nga kun may duda, mag-imbistiga. Gaduda ko nga duna kay gustong bunalan. Kay nagbitbit ka ma’g bunal,†ni Sonia. Gikulbaan. Nangluspad og gamay.
Kini sab gud si Carlo, di masabot ang hitsura. Kasagaran seryoso og nawong. Isog og tinan-awan. Kun lawom ang gihunahuna unya wa magpahiyom o magkatawa, mora na’g naglagot. Mahadlok gyud si Sonia nga magtan-aw sa nawong ni Carlo.
“A wa ra ni, Son. Para ni’s iro. Kay inig agi nako diha sa eskina, dunay mga iro nga monunot nako,†ni Carlo. Nipahiyom og gamay. Gigamit nga sungkod ang bunal.
“Ah mao ba? Salamat kun mao kana,†ni Sonia.
Nipadayon og duko aron mahuman iyang pagpamisibis.
Nahanaw ang kakulba ug kahadlok. Wa na niya susiha kun asa hiposa ni Carlo iyang gibitbit. (Katapusan)