Lord, how great thou art...!

Upat ka adlaw nang gipangita ni Lando ang mabdos niyang asawa. Gikapoy na siya ug hapit na kawad-i sa paglaum. Nahinumdum si Lando nga naglutaw pa siya sa tubig, nagpusnga sa kalisud ang mabdos niyang asawa nga nagunit sa iyang bukton ug nagkanayon:

“Lan, luwasa ang imong kaugalingon....!”

Dayong pamuhi sa iyang bukton ug gianud sa tubig ang mabdos nga asawa ngadto sa dapit nga wa masayri ni Lando.

“Oh Rosita, asa ko ikaw pangitaa...!” Tuaw ni Lando samtang nagpungko sa naglaundok nga mga kahoy’ng giguba pag-ulbo sa dagat. Naghukdong intawon...!

Ang Tacloban gikusokuso sa bagyong Yolanda ug gumikan sa iyang kakusog, miulbo ang dagat paingon sa dakbayan. Nangapayhag ang kabalayan. Nagkaguliyang ang mga tawo human sa makusog nga bagyo. Ang uban nangawat na lang tungod sa kagutom ug kauhaw.

Sa ikalima ka adlaw, miadto si Lando sa nagusbat nga kapilya duol sa dagat sa dakbayan sa Tacloban nga mora’g way tumong. Nabati niya ang wali sa pari nga itugyan lang ang pagsalig sa Diyos pagpangita sa mahal sa ilang kinabuhi. Nakahilak si Lando. Nagbakho nga nangurog ang kalawasan sa pulong sa pari. Unya, may mihunghong kaniya.

“Ayaw paghilak. Lakaw ngadto sa barko sa mga Amerikano aron makita mo ang imong asawa....!” Miingon ang hunghong nga nakapapugwat kang Lando.

Milakaw siya padulong sa baybayon. Misakay si Lando sa lansa nga midunggo sa baybayon ug mipaingon ngadto sa barko nga nag-utaw-utaw sa lawod sa Tacloban. Ug pagsaka niya sa barko, nakita ni Lando si Rosita nga natulog nag-ubay sa bag-ong inanak nga bata. Sa dakung kalipay, gihalog niya ang asawa.

“Rosita..., akong Rosita, salamat nga nagkita pa kita...!” Maoy namat-an ni Rosita ang hugot nga gakus ni Lando nga mora’g buang.

“Lando..., Lan.., salamat sa Ginoo nga buhi pa kita...!” Naginaksanay sila.

“Lan, ang atong anak. Babaye kini ug atong nganlan og Yolanda...!” Mitimbakuwas si Rosita ug gialsa ang bag-ong inanak nga bata.

“Oh Lord, how great Thou Art!” Tuaw ni Lando dungan ang pagluhod nga nagdawat sa bag-o nilang anak nga si Yolanda. (Katapusan)