Dili kadudahan

Dear Tita Salie,

Maayong adlaw kaninyong tanan nga nagsunod sa column ni Tita Salie. Tawga lang ko og Jenivah, dunay kapuyo sulod na sa 14 ka tuig ug dunay tulo ka buok mga anak.

Sa una nagtuo gyod ko nga buotan kaayo kining akong partner, Tita Salie. Dili gyod kadudahan nga makamao siyang magbinuang. Hangtud nga akong nasakpan nga duna siya’y gikabuangang laing babaye nga wala gyod ko’y kasayoran.

Naguol ko, Tita Salie, tungod kay nag-eskuyla pa baya ang among tulo ka mga anak.

Ang akong pangutana mao nga makapangayo ba ko niya’g suporta alang sa mga bata? Kay nasayod man ko nga dili gyod nako kayang buhion ang akong mga anak. Palihog pasabta ko sa angay kong buhaton. Thank you very much.

* * *

Maayong adlaw usab Jenivah,

Of course, puyde gyod kaayo kang makapangayo’g suporta alang sa imong mga anak gikan sa ilang amahan. Responsibilidad kini sa amahan nga iyang suportahan ang iyang mga anak.

Apan, I think dili man ingon niana kadaotan ang imong partner tungod kay matud nimo nga buotan kaayo siya. So, mura og puyde pang masalbar ang inyong relasyon. Tingali kun naanad lang ang imong partner sa bul-og sa mga pagsulay ug napukan ang iyang kahuyang.

Estoryahe ang inyong problema pinaagi sa hinay nga tingog ug hinay nga paagi aron magkasinabot mo sa inyong problema. Pangutan-a kun nganong iya kining nabuhat ug pasayloa siya. Ug tagai og laing higayon ang imong hinigugma. -- Tita Salie