Mora na’g mga bata

Low bat man lang gihapon ni! Ako man ning gipa-recharged nimo! Wa man diay nimo gi-recharged!” ni Brendo ngadto’s iyang kapikas nga si Shirley. Malagutong naggunit si Brendo sa selpon samtang naglingkod sa ilang sala atubangan sa TV nga flat & wide screen. Nagsalida og basketbol.

Niduol sa sala si Shirley gikan sa kusina. Nataligam-an niya ang  pag-recharge sa selpon kay may gidigamo siya sa kusina ning sayong kahaponon.

“I-charge na o!” ni Brendo dungan ang paglabay sa selpon ngadto’s kapikas.

Maayong pagkaigo sa dughan ni Shirley. Nilagubo ang selpon sa dughan niya. Unya, kay wa niya nasawo, ang selpon natagak sa sawog nga may carpet nga berde. Nisurok sab ang dugo ni Shirley. Gipunit ang selpon ug gilabay balik ngadto sa iyang bana ang selpon.

“Ikaw lay pa-recharge ana!” ni Shirley. Naigo sa selpon ang walang abaga  ni Brendo.

Mga init na’g ulo ang managtiayon nga lapas na’s singkwenta ang pangidaron. Si Brendo singkwenta i otso. Si Shirley singkwenta i singko. Gamay’ng ligas, away dayon. Lalis dayon. Siningkahay dayon. Linabayay og mga butang. Dagko na man gud ilang mga anak. Puro na ulitawo’g daga ang duha.

Kulang na sa romansa ang mga tiguwang nang magtiayon. Puro na lang negosyo ang giatubang. Si Brendo, kay usa ka enhenyiro, tua maglabi ang panahon sa iyang construction firm. Si Shirley kay culinary artist, tua sa iyang bakeshop ug restobar. Adlaw’ng Domingo ra sila mag-abot.

Nibanda ang selpon sa abaga ni Brendo ug nitugpa sa lamesita nga bildo atubangan niya.

“Tsuk! Tsuk!” Nitingog ang selpon pagtugpa. Wa nabungkag.

“Oy! Kalig-on ining selpona!” ni Brendo nga daw nakurat. Nawala ang kasuko. Gipunit niya ang selpon.

“Lig-on bitaw kaayo no?” timang ni Shirley. Nakapahiyom. Ug nahanaw ang kasuko nila sa usa’g usa. Nabaraw lang sa lig-on nga selpon.

Ingon na gyud tingali ang managtiayon ini kun matiguwang na. Mora na sa’g bata. Daling mag-away. Dali ra sang mag-uli. Way dumtanay. (Katapusan)

Nagpari si Rico

Fredrick F. Gelbolingo

Ania karon ang magtiayong Fancymee ug Tingyo sa airport. Nagpaabot sa pagtugpa sa abyon nga giluwanan sa ilang anak, tipon sa ubang mga tawo nga nagsugat sab sa ilang mga kabanay nga gikan sa abroad.

Tuod man mitugpa na ang eroplano nga gi-text sa ilang anak nga maoy iyang sakyan padung balik diri sa Pilipinas. Sa paghunong niini miuna’g kanaug ang usa ka gwapa ug seksing babaye nga mora’g si Britney Spears. Nanghugyaw ang mga tawo nga nakakita.

Nakaingon po’g “Wow!” si Tingyo. Ug wa lang palandonga midagan kini padung kaniya sa way tingog-tingog ug gigakos siya sa kahinangop. Gahi gung iyang ubos. Gigakos pong iyang asawa.

“Taym pa. Kinsa man ka Day, Gwapa?” Kahikurat ni Nang Fancy.

“Ma, Pa. Wa na mo kaila nako?” sa babaye nga milakra ang yukom sa nawong sa tumang pahiyom.

“Naaan lang tingali mi nimo, Day. Wa man mi anak gwapa. Gwapo hinuon. Pareson gyud mo. Tan-awa ignaug adto sa eroplano nga mao poy imong gisakyan. Bugtong namo siyang anak. Asa man to, ha. Dali Tingyo!” gibira ni Nang Fancy iyang bana.

“Giganahan ka uroy anang bayhana.” Ug nanglakaw sila.

“Ma, Pa. Ako ni si Rica. Anak ninyo. Wa na mo kaila?” apas sa babaye gikuptan ilang mga kamot.

“Si Rico ang among anak,” nagdunga’g sulti ang magtiayon.

“Ako kini, Ma, Pa. Rico is now a Rica.” Padayong ngisi sa babaye.

“Unsaaaa!!!” Nagdunga’g udhak, ang magtiayon. Ila kining gitutokan ug may nakita silang mga timailhan nga si Rico gyud kini.

“Rico! Unsa ba kini? Ingon ka muadto ka’g U.S.A. kay magpari?” Milingo-lingo ka napu si Tingyo. Misunod pong iyang asawa. Kabaynte. Nagpari bitaw ko,