Ang hustisya buta

Subo ang hitsura ni Atty. Chona Buringo, clerk of court sa RTC Branch 99 sa lungsod sa Malana, nga nag-agak sa iyang bana gikan sa kotse ngadto sa gate sa ilang balay. Dili kakita si Engr. Yolando Buringo ug nagpangapkap sa hangin karong sayong kahapunon sa pag-uli sa ila gikan sa ospital. May bandahi ang duha niya ka mata. Gioperahan iyang mga mata kay napuling og gagmay’ng tipak sa bildo dihang nadisgrasya iyang sakyanang gimaneho. Lima ka adlaw siya sa ospital. Daw blindfold nga puti ang bendahi sa iyang mga mata.

“Dili kaha ako’y gikastigo sa Ginoo? Kay ni-tolerate lang ko sa imong anomaliya sa husgado?” ni Yolando dihang nakalingkod na sa kutson sa ilang sala. “Unsang anomaliyaha imong gipasabot?” ni Chona. Naisang kilay. Ug nangyamiid. “Nagsige gud ko’g ingon nimo nga ang hustisya buta. Unya nasayod ko nga duna kay abogadong gikasilagan. Di gyud modaug sa inyong husgado iyang kaso,” ni Yolando.

“Ah kana si Atty. Terio Yano? Hambugero man gud kaayo nang tawhana. Bantog rang nakapasar na siya sa bar, siya na lay kamao!” ni Chona, nga tataw ang pagsurok sa dugo sa paghisgut sa ngalan sa abogado. “Di ba duna siya’y tulo ka kaso nga bisa’g lig-on iyang mga ebidensiya, ikaw gyu’y nangunay nga naghimo sa desisyon sa pagpildi niya? Nihangyo gyud ka mismo sa huwes, nga ikaw mohimo sa desisyon?” ni Yolando. “O. Ngano man diay?” ni Chona. “Dihang imo kong gihisgutan ana, di ba giingnan tika ‘ang hustisya buta’?” ni Yolando. Bitaw, wa ko malimot ana!” ni Chona. Nahisagmuyo. Nilingkod sa sopa nga pinabundak ang lawas. Daw may kabug-at nga gipas-an.

“Ako ang gikastigo sa Diyos nga wa nibadlong nimo sa imong paglubag sa hustisya!,” ni Yolando. Niduko nga mora’g nitan-aw sa iyang sapatos bisa’g may bendahi ang mga mata. Nakalantaw sa halayo si Chona. Nangluspad. Nitibi. Nanglugmaw iyang mga luha. Niginhawa’g lawom. Tataw ang pagbasol niya sa iyang mga nabuhat. (Kataposan)