Gihingusgan nga kampanya sa D0H

Daghan ang nag-ingon nga dili lang ang hiningusgang kampanya sa Department of Health  (DOH) nga pagdili sa paggamit sa rebentador  maoy nahimong hinungdan sa pagkunhod sa gidaghanon sa biktima sa paboto karong tuiga kun dili ang nasinati usab nga kalisod nga namugna sa katalagman sa linog ug bagyong Yolanda.

Matud pa nila nga tungod sa kalisod sa kuwarta ug kamahal sa palaliton maoy gihunahuna sa mga tawo ang pagpalit sa mga nag-una nilang panginahanglan ug gipaulahi o gihiklin na lamang ang naandan nga pagahimoon nga pagpaboto sa pagsugat sa Pasko sa tuig 2013.

Hinuon adunay mga nagtuo nga dili pa gayod masiguro ang pagsaka sa gidaghanon sa mahimong biktima sa paboto kay posible man nga ang wala magpaboto sa Pasko  apan tingbon usab nila ang pagpaboto sa pagsugat sa Bag-ong Tuig.

Ang kampanya sa paglikay sa paggamit og paboto sa panahon sa pagsugat sa Pasko ug Bag-ong Tuig nga gipasiugdahan sa DOH dinhi sa nasud daw susama usab sa gihingusgan nilang kampanya nga paglikay sa sakit nga Human Immunodeficiency  Virus  (HIV) dinhi sa nasud.

Nagpadayon ang ilang gihingusgang kampanya ngadto sa katawhan pinaagi sa ilang pag-edukar nga nagpahimangno ngadto sa mga tawo sa paglikay sa Acquired Immunodefiency Syndrome (AIDS) apan sa taho sa DOH maoy nasayran nga nagpadayon lamang gihapon nga adunay mabiktima sa maong matang sa balatian nga hangtiod karon wala pa gihapon madiskubrehi ang tukmang tambal.

Si DOH Spokesperson Eric Tayag sa iyang pamahayag dili pa lang dugay maoy iyang gipadayag nga 384 nga gidaghanon ang gitakboyan  sa bulan lamang sa Nobiyembre sa tuig 2013.

Dugang pa niya nga ang Pilipinas maoy natala sa United Nation nga usa sa siyam ka mga nasud sa tibuok kalibutan nga nagpadayon ang iyang pag-usbaw sa gidaghanon sa HIV cases.