Isla Paraiso

Usa ka hapon niana sa pagpamisita ni Rey kang sister Veronica, wala moatubang ang madre kaniya. Ang kauban niini nga madre ang nakigsulti kang Rey.

“Lain kuno ang pamati niya sa iyang lawas,” matud ni sister Margarette. “Gusto siyang mopahuway.”

“Mopauli na lang ko, sister,” ni Rey pa ngadto sa gikaatubang nga madre. Ingna lang siya nga papahulayon pag-ayo.”

Miyango ang madre.

Huyhoy ang mga abaga ni Rey nga migawas sa kombento. Miluta ang tuman nga kasubo sa iyang panagway nga wala niya makita ug ikasulti ang madre nga iyang gimahal karong hapona. Ingon sa wala sa iyang kaugalingon si Rey samtang nagsakay sa taksi nga naghatod kaniya ngadto sa balay nga iyang gikaserahan sa Mambaling.

Nianang pagkagabii wala makatulog si Rey. Nahasol ang iyang hunahuna. May kahulogan alang kaniya ang wala pag-atubang ni sister Veronica kaniya. Nakasabot siya karon nga ingon sa buot nang molikay ang madre kaniya. Kana, dili na magpasamok. Kini ang kanunay ihangyo ni sister Veronica sa higayon nga magkasulti sila ni Rey. Ug kay wala man siya mopatuo mao nga milikay na kini kaniya.

Dili mahimong likayan siya ni sister Veronica. Mamatay siya kun dili niya makita ang madre. Gimahal niya kini nianang pagmahal nga dili masukod sa bisan unsang matang sa sukdanan. -- Sumpayan pa