Maanyag nga bakwit

Gula 5

Sa ilang pagpanuroy ni Ariel ug Mirasol sa SM City, gipamalitan sa ulitawo og mga sapot ang maanyag nga bakwit gikan sa Tacloban City. Dili matukib sa pulong ang gibati nga kalipay ni Mirasol sa gipakita nga kabuotan kaniya ni Ariel.

Nakapasamot kini sa ilang kasuod. Milabay ang mga adlaw. Miabot gayud ang panahon nga magkabuwag na sila si Ariel ug Mirasol kay ang tibuok pamilya sa dalaga gikuha kini sa iyang uyoan nga gikan sa Manila.

“Daku og yuta si Tiyo sa Quezon City ug kami maoy papuy-on niya sa usa niya ka balay. Adto na lang kuno ‘sab mangita og trabaho si Papa didto Ariel kay mahadlok na mi mopuyo pagbalik sa Tacloban,” matud ni Mirasol.

Masub-anon kaayo si Ariel nga nakadungog sa mao nga pamahayag ni Mirasol. “Ngano nga mora ka man og nasubo Ariel? Maayo hinoon aron minus na kamo og atimanon nga mga evacuees dinhi sa inyong dakbayan,” sa dalaga pa.

Wala dayon makatingog si Ariel. Hangtud nga miabot gayud ang adlaw nga sakit kaayo alang kang Ariel – ang paglarga na nila ni Mirasol. Daku unta kaayo siya’g tinguha nga daygan niya si Mirasol sa iyang pagbati, apan wala niya kini mahimo.

Miambak gayud sa kaapingan ni Ariel ang maasgad nga mga luha dihang gihatud niya sila si Mirasol didto sa Mactan Air Base aron mosakay na sa C-130 Plane sa Air Force nga mohatud kanila sa Manila.

Sa dayon na nga panamilit ni Mirasol kang Ariel, gipig-it niya ang kamot sa dalaga. “Lughaw ang iyang tingog nga klaro kaayo nga kahilakon. “Mir, pag-ayo-ayo didto sa Manila. Timan-i nga mahal ko kaayo ikaw, I love you Mir,” matud ni Ariel.

Mitutok makadiyot si Mirasol kaniya ug duna pa unta’y isulti apan gitawag na siya sa Air Force nga molupad na ang C-130 plane. “Magkontakay ra kita Ariel. I love you too,” matud ni Mirasol sa dayon na nga biya niya ni Ariel.

Bisan og luhaan ang mga mata ni Ariel apan kalit lang mibathay ang usa ka matam-is kaayo nga pahiyom sa iyang panagway. Milupad ang C-130 plane nga gisundan pagsud-ong ni Ariel hangtud nga nahanaw na kini sa iyang panan-aw.

Mibalik si Ariel sa dakbayan sa Sugbo aron moatiman sa ubang mga evacuees gikan sa Tacloban. Diha sa iyang kaisipan ang pagmahay kun ngano nga wala siya makabaton og kaisog sa pagtug-an sa iyang gibati kang Mirasol dihang nagkauban pa sila dinhi sa Sugbo. - Sumpayan