Way kalainan sa tanang adlaw

Disyembre 25. Sayong nangmata ang bana’g asawa nga sila si Tibong ug Emma. Sa naandan, nagkawos og tubig si Tibong ginamit ang sag-ob. Nilugsong siya ubos-ubos sa ilang balay sa tiilan sa bungtod. Tua didto ang atabay nga may tubod sa tubig nga nag-awas.

Pagkahuman, nagbugha og kahoy para dunay ikasugnod si Emma sa iyang pagdigamo para sa ilang pamahaw. Sayo silang natulog sa niaging gabii. Labi na nga wa nay butobuto. Di na moabot sa ilang payag nga layo sa lungsod, ang mga baligya nga pabuto.

Wala gyud sila anang gitawag og Noche Buena. Kay kabos man lang sila. Ug wala’y mga higala o paryente nga moregalo nila’g mga butang. Bisan ilang bugtong anak nga si Glen, diyes anyos, nagtungha na’s grade four sa saring publiko, wa naanad og duwaan nga regalo o hinatag.

“Pasensiya ka na anak. Kay wa may klarong kita si papa nimo isip masyador sa buwangan. Wa gyud ko’y ikaregalo nimo sa Pasko,” ni Tibong ngadto’s iyang anak, sa pagmata.

Nanghimuta si Glen nga naglingkod sa hagdang kawayan nga tulo ray ang-ang.

“Si mama sab nimo, ang ganansiya sa paninda’g isda, igo rang ibayad sa mga utang. Makautang man gyud ta kun mahutdan ta’s para pamugas ug panud-an,” dugang si Tibong.

Nilingi ang bata sa iyang amahan nga naglingkod sa sawog nga kawayan. Samtang iyang mama nagtayhop sa gihaling sa abuhan, sa usa ka eskina sa usa lang ka lawak.

“Way kaso Tay oy. Ako ra may mohimo sa akong mga duwaan. Sama karong paskoha. Wa man koy pandaritas. Nagdukdok lang ko’g tansan. Ang kita nako sa panaygon, ako mang gitagana para mga gamit nako sa eskuylahan,” ni Glen.

“Basta, maayo lang ta’g lawas, way sakit, malipayon na ta,” timang sa iyang Nanay Emma.

“Kun unsay tempo nga duwaan sa ato, Tay, maghimo ra ko. Sama sa luthang, kasing, o tirador. Kun magkinahanglan ko’g kuwarta, mamunit lang ko’g tagak nga lubi. Ibaligya sa merkado, makapalit na ko’g gamit para sa akong duwaan, sama sa guma, gamit sa tirador o pisi, gamit sa kasing,” ni Glen. Nagpahiyom.

“Puwede sab ko mangarga sa merkado. Kun dunay tiguwang akong tabangan og alsa sa ilang mga kinompra, masuholan man sab ko nila. Makakuwarta lang ko’g ginagmay, bastante na,” dugang ni Glen. Nakapahiyom si Tibong.

“Ang imo lang pagtoon anak, maoy asikasoha pag-ayo. Aron di ka maparehos imong mga ginikanan nga way grado. Dili makatrabaho og dakong sweldo kay dili kalipikado,” ni Tibong.

“O Tay. Mao nay akong pinaskohan ninyo kada tuig. Nga makasaka mo sa stage aron pagtaod nako’g ribbon kada sira’s klase. Kay pirmi man kong valedictorian,” ni Glen. Mapasegarbuhon.

“Salamat anak nga wa gyud ka mokopya sa kinaiya sa imong mga nailhang mga higala nga mga anak og adunahan. Ayaw usba imong kinaiya. Paningkamot sa imong hayag nga kaugmaon. Kay inig ka tiguwang namo, ikaw may makahatag namo’g kaharuhay,” ni Tibong.

“Alang sa mga adunahan, Tay, ang adlaw sa Pasko, lahi gyud alang nila. Pero natong mga kabos, way kalainan sa tanang adlaw,” ni Glen. Nitindog. Nilakang paduol sa amahan. Nitupad og lingkod.

“Merry Christmas natong tanan,” ni Emma nga nibutho sa ilang luyo. Gigakos silang duha.

“Merry Christmas, Nay, Tay,” ni Glen. Nigakos sa amahan.

“Merry Christmas, anak,” ni Tibong. Nagginaksanay silang tulo. Ug nibalik si Emma sa abuhan.

Pagbalik niya nagbitbit siya’g bulsita nga may sulod. “O, niay pan de sal akong nautang sa panaderya gabii. Ato ning parisan og sikwate. Kay nakautang sab ko’g tabliya” ni Emma nga nagtunol sa bulsita ngadtos iyang kapikas. Gidawat ni Tibong.

“Kuhaa ring mga tasa sa sikwate para nimo Glen ug sa imong tatay,” ni Emma nga nibalik sa abuhan.

“Yeheee! May sikwate sa among Christmas Party!” ni Glen nga nitindog nga nagluksolukso. Nauyog ilang payag. (Kataposan)