Sa alas dose ang takna

Human sa lima ka tuig nga sentensiya, nakagawas ra gikan sa Bagong Buhay Rehabilitation Center si Carding. Para niya mao na siguro kini ang pinakadako nga pinaskuhan nga niabot alang kaniya. Wala siya magpahibalo sa iyang pamilya nga nakagawas na siya. Imbes adto siya modiretso sa ilang balay sa barangay Kadulawan didto hinuon siya modiritso sa sikbit niini nga barangay, sa balay sa iyang uyoan ang ulitawong guwang nga si Tereso.

“Dili lang ko modiretso sa amo-a tiyo, nahadlok man gud ko nga nasuko pa kanako si Tatay Isidro tungod sa akong pagkabilanggo. Basin og wala pa ko niya mapasaylo,” matud ni Carding.

“Puwede kaayo dong nga anhi lang ka estar sa akong payag pero nganong dili man nimo sulayan og atubang ang imong amahan mapasaylo na tingali ka niya panahon na pud karon sa Pasko,” nagkanayon si Tereso.

Mga lima ka tuig nga nabilanggo si Carding sa BBRC sa kaso kabahin sa drugas. Kini tungod usab sa iyang pakigbarkada sa mga istambay sa ilang lugar. Gumikan sa maong hitabo hapit atakeha sa high blood ang iyang amahan nga si Noy Isidro. Wala man unta kini magkulang sa pagmaymay sa iyang mga anak ilabi na kang Carding. Bisan sa iyang sakit nga hubak nagpadayon pa pagka taxi driver si Manoy Isidro inig dayong uli niini magdala kini og tagsa ka baro nga lamaw gikan sa mga suki niining mga karenderiya para sa ilang babuyan, aron lang ma ekstra income. Samtang ang inahan niini nga si Ester usa ka kugihan nga sastre.

Ang tanan nga paningkamot sa magtiayon para lang gayud mapatunhay ug mapalampus ang mga anak niini. Nagbunga gayud ang ilang paningkamot kay nakalampus man ang duha ka magulang ni Carding. Sila si Eleazar ug si Crisanto.

Si Eleazar usa ka cashier sa usa ka bangko sa dakbayan sa Tagbilaran samtang si Crisanto, usa ka engineer nga tua nadestino sa Dumaguete City. Pulos aduna nay tagsatagsa ka pamilya. Ginaingon nga sa usa ka bulig nga lubi usahay adunay usa nga boang ma-o kini ang ta-aw ni Carding sa nahitabo sa iyang kinabuhi.

Dili tiaw ang kapait nga nasinati ni Carding samtang didto pa siya sa sulod sa bilanggoan pero didto usab nalamdagan ang iyang pangisip sa kanunay niya nga pag-attend sa Bible sharing nila ni Padre Joel ug Padre Larry nga magbisitahan didto. Mao nga naumol ang usa ka desisyon nga magbag-o na siya. Ma-o kadto nga namenos ra ang iyang sentensiya.

Petsa bayente kuwatro, alas onse pasado sa kagabhion. Gumikan sa tambag ug pagdasig sa iyang tiyo Tereso nakahukom si Carding sa pagpakigkita sa iyang pamilya. Apan sa dihang diha na siya tungod sa may punoan sa mangga dili halayo sa ilang balay kalit siya nga gidaog sa kahadlok basin unsay reaksyon sa iyang pamilya ilabi na sa iyang Tatay Isidro.

Nihunong siya paglakaw ug nagpaatbang sa ilang pinuy-anan iyang nabatyagan ang bugnaw nga huros sa hangin nga dala sa panahon sa Pasko. Ang kabugnaw niini mikuyanap sa tibuok niyang kalawasan. Gikan sa iyang nahimutangan iyang nalantaw ang ilang pinuy-anan.

Adunay mga mabolukon nga mga parol nga gibitay sa mga bintana niini. Tungod sa kahayag sa mga series lights nga gidayandayan iyang nalantawan ang iyang inahan, ang iyang mga igsoon kauban ang mga tagsatagsa nila ka asawa ug mga anak.

Mao pay ilang pag-abot gikan  nga nitambong sa Misa de Aguinaldo. Didto usab ang iyang mga bayaw. Malipayon kaayo silang tan-awon ug didto sa lamesa ang mga lami nga mga pagkaon ug mga regalo. Nanguli gayud gikan sa ilang tagsatagsa ka lugar ang iyang mga igsuon aron pagtambong sa ilang Noche Buena. Pero wala niya hikit-i ang iyang Tatay Isidro. Basin atoa kini dapit sa kusina.

Sa paminaw ni Carding kini na siguro ang pinaka malipayon niya nga Pasko kun makauban niya ang tibuok niyang pamilya sa Noche Buena karong Paskoha. Malipay ba usab kaha ang iyang tibuok nga pamilya sa iya unyang pagbutho? Wala siya makabaton og igo nga kaisog nga mopadayon ngadto sa ilang balay. Huyhoy ang abaga nga nitalikod si Carding ug nakahukom na lang unta nga mobalik sa iyang agi. Mao gayo’y paghagtok sa ika-alas dose ang takna sa kagabhion, sa dihang iyang naamguhan nga may mga bukton nga niagbay sa iyang abaga. Ug pagyanghod pa niya maoy iyang nakita ang maaghop nga hitsura sa iyang amahan.

“Anak nganong wala ka man modayon sa atong panimalay, bag-o pa kaming nakabalita nga nakagawas ka na diay. Nganong wala ka man magpahibalo?”

Wala makapugong si Carding sa paggakos sa iyang amahan ug iya na lang naamguhan ang mga luha nga nidagayday sa iyang mga mata. Luha sa kalipay. (Katapusan)