Isla Paraiso - Gula 37

Apan nakadugang hinuon sa pagtuo ni Rey Corpuz nga tinuod ang report nga ilang nadawat gikan sa intelligence nga may shipment nga moabot dinhi ning maong beach resort karong gabhiona. Misantop sa iyang hunahuna nga gituyo kadto sa mga tawo nga anaa sa sulod sa maong beach resort -- ang pagpalong sa tanang suga aron magduda ang mga tawo nga makalabay nga wala’y tawo ang beach resort.

Gitan-aw ni Rey ang relo nga naggakos sa iyang pulso. Pinaagi sa amag sa mga kamot niini diha sa kangitngit, iyang nasayran nga alas siyete i-medya na. Naghinamhinam na siya. Sumala sa report alas otso moabot ang shipment.

Sumala sa plano, anha na nila dakpa ang mga sakop sa sindikato kun madiskarga na ang mga kargamento. Kutob sa mohimo’g dautang lihok ilang patyon. Apan ang dili mosukol ug motahan nga malinawon dili nila pasakitan.

Samtang naglakaw ang mga gutlo, misamot usab pagtaob ang kahinam sa balatian ni Rey. Naghinamhinam na siya sa pagdakop sa mga tigpayuhot sa gidiling drugas sa dakbayan. Kontra kaayo niya ang maong mga tawo. Alang kaniya, ang mga tawong dautan dili angay padaghanon dinhi sa kalibotan.

Pagkilab sa pipila ka gutlo, nakadungog ang kapolisan og andar sa makina nga naggikan didto sa lawod ug ingon sa nagpaingon sa baybayon. Wala tuyoa, nahulbot ni Rey ang iyang pistola.

Gihugtan ni SPO3 Rey Corpuz paggunit ang pul-an sa iyang .45 kalibreng pistola. -- Sumpayan pa