Dili madubok ang tinap-anan kun mainitan

Hasta makapila manghupaw si Ulang, kun ngano nga wa gayod siya maligo, sulod sa usa ka semana, nga nasayod man unta siya nga kaslonon ni Pasyo. Karon ulahi na ang tanan, diin humana ang ilang kasal ning ilang dakong simbahan sa lungsod sa San Fernando.

“Naghinamhinam na baya ako Ulang, nga inig kahuman sa atong kasal, makadimdim na gayod ako sa katam-is sa saro sa himaya!” mao kini ang kanunay manumbaye sa hunahuna ni Ulang, ang daw kinamayan nga pulong kaniya ni Pasyo samtang gipahigayon na sa pari ang misa sa ilang kasal.

Igo lang niyang gipakiwi ang iyang ngabil. Nagpanghadlok man god siya, basin inigsugod og karinyo kaniya sa iyang bana, makapanimaho kini og patay’ng ilaga, nga gikan manghungaw sa iyang bilahan.

Karon nahuman na gayod ang ilang kasal. Way hunong ang pagpanggisod nga daw bugbog sa bugnaw nga singot ang tingkoy ni Ulang, ilabi na nga nagsugod na usab pagpangalisbo ang baklag nga baho, hangtud nga siya nahinanok og hinuwat sa iyang bana nga nag-atiman pa sa pipila ka buok nilang bisita.

Dili ikalimod, nga ning ilang dapit sa balangay sa Kiwkiw, usa si Ulang, nga maihap nga dalagang guwang, gumikan sa iyang kahimilian og lalaki. Karon nga ania na siya sa kagulangon sa iyang pagkadalaga .... suwerte na kaayo nga nakigminyo kaniya si Pasyo, ang ulitawong guwang nga manananggot nga ila ra usab nga silingan.

“Abi nimo Pasyo ... kini pa ang unang higayon, diin ako makatagamtam sa kinabuhing minyo, karong gabii human sa atong kasal!” sobra kaparaygon ang ganay sa tingog ni Ulang.

“Dili ba kaha ako kuyapan?”

“Relax lang kanunay Ulang parehas baya ta, nga wa pa gayod makatilaw!” mubong tubag ni Pasyo.

Takulahaw ... mao na lamang ang namat-an ni Ulang, nga daw dihay kagahi nga mihuot ubos sa iyang bilahan. Hilabihan ra ba kabinhod.

“Wa kay napanimahoan akong mahal nga Pasyo?” nagkayuring ang sinultihan ni Ulang.

“Wa man,” mubong tubag ni Pasyo nga nagkanguhal.

“Basin baya aduna kay napanimahoan nga nangalisbo gikan sa akong tinap-anan?” nagkurog ang tingog ni Ulang.

“Dili mahitabo nga manimaho ang imong tinap-anan kun madubok Ulang, basta mainitan!” misamot kanguhal ang sinultihan ni Pasyo. (Kataposan)