Kindergarten

Ang dakong bayranan sa pagpatungha og kindergarten; suhol sa mobantay, plite sa taxi, matrikula ug uban pa, maoy gireklamohan ni Titing.

“Nganong adto man gyud nimo patunghaa si Zephaniah sa siyudad nga anaa man untay ‘Day-Care Center’ sa kilid sa atong Barangay Hall nga puwerting duola?

Ang kaundanon ug kaugdang sa katarungan ni Reming maoy nakapahilom ni Titing. Natuman ang gusto ni Reming nga si Zephaniah adto mo-eskuyla sa eskuylahan nga gidumala sa mga Madre sa tuyo nga ma-usab ang kasipat niini. Makat-on usab sa husto nga paggamit ug pagsulti sa pulong nga Eninglis aron makasabot kini inigsinultihanay unya sa iyang mga ig-agaw nga mamauli matag Pasko.

Sa pito ka apo nga mga lalaki ni Reming-Titing, si Zephaniah ra ang nahatipon pagpuyo sa ilang panimalay. Ang iyang mga ig-agaw atua manimuyo sa Thailand, Canada ug Amerika.

Kanunay’ng idulog ni Reming si Zephaniah sa ilang pagkatulog.

Niining adlaw’ng Domingo alas otso na sa buntag nga nakamata si Reming. Wala na si Zephaniah sa iyang kilid. Iya dayon kining gipangita. Gipangutana si Titing kun hain kini.

“Atua sa pultahan sa atong koral,” tubag ni Titing nga nag-andam sa ilang ipamahaw.

Migula si Reming sa balay ug gitawag ang iyang apo: “Zeph come!”

Pagduol ni Zephaniah, gisukna dayon kini ni Reming sa iyang naandan nga pangutana.

Nakapahiyom si Reming sa kaabtik manubag ni Zephaniah. “Ok, let’s go, we will get your puppy from the boy,” agda ni Reming.

Nagkuyog ang apo ug apohan ngadto sa nahimutangan sa itoy ug bata.

Ang itoy nagtilaptilap sa nana nga niagos gikan sa dakong kabahong diha sa batiis sa bata.

Ang luod nga panan-awon nakapahinumdom ni Reming sa makaluluoy niyang kahimtang kaniadto kun itandi sa iyang kahamugaway karon. Napatungok siya nga naghanduraw sa iyang kagahapon.

Giyugyog ni Zephaniah ang kamot sa iyang Lolo nga nahilom. “Lolo, lolo, can we help the boy? Our teacher said: ‘Help the poor.”

Ang hangyo ni Zephaniah mitidlom sa kinailadman ni Reming. Kindergarten pa lang, nagpakita na og maayong linugdangan ang pag-eskuwela ni Zephaniah sa eskuylahan nga gidumala sa mga Madre.

Puno sa kalipay ug kadasig nga giagda ni Reming si Zephaniah: “Get in the car Zeph; will bring the boy to the clinic.” (Kataposan)