Panaygon sa PUJ bisan way Pasko

Bulan karon sa Disyembre ug karong bulana sa nangaging katuigan mao usab unta ang panahon nga atong mabati ang Paskohanong mga awit nga ipatugtog sa dagkong mga mall ug ingon man sa kahanginan pinaagi sa nagkadaiyang mga sibyaanan sa radyo.

Ang atong namatikdan niining tuig 2013 nga bulan sa Disyembre daw dako kaayong sukwahi kay daw panagsa lamang nato mabati ang Paskohanong mga awit nga posible mao kini ang nahimong epekto sa duha ka dagkong katalagman nga nahitabo ang 7.2 magnitude nga linog ug bagyong Yolanda nga nagbilin og dakong kadaut sa mga kabtangan ug mikalas og kinabuhi.

Sa nangaging katuigan gawas nga mabati nato ang mga Paskohanong awit nga ipatugtog sa dagkong mga mall ug mga sibyaanan sa radyo  dili usab magpaiwit sa pagpahimulos ang pipila nato ka mga kaigsoonan sa pagsaoysaoy sa adlaw ug gabii sa kadalanan nga ang katuyoan mao lamang ang pagpanaygon sa mga panimalay o mga tindahan nga ilang malabyan.

Karong panahona daw wala na kaayo nato makita kining maong talan-awon  ug  hayan nga hinungdan mao ang nahitabo nga duha ka dagkong katalagman nga bisan kun nakalingkawas kita niini apan dili gayod mahiklin nga daghan pa kanato hangtod karon ang gikugangkugangan nga makahunahuna dayon sa pagdagan bisan sa gamay lang nga pagtay-og sa dapit niining nahimutangan.

Hinuon ang pagpanaygon sa mga bata sa kadalanan ug bisan sa mga PUJ nga sakyanan wala gayod kini mahunong hangtod karon kay ato man gihapon sila nga makita nga maglabanglabang sa dalan sa matag karon ug unya nga nahimutang sa ilang kakuyaw nga maligsan og sakyanan.

Napasagdan kini sa ilang mga ginikanan ug  ang mga ahensiya sa atong kagamhanan sama sa buhatan sa Department of Social Welfare and Development (DSWD) 7 ug ang kapolisan walay nahimo kay minor de edad man ug dili mahimong dakpon ug ibalhog sa sulod sa bilanggoan.

Ang laing pundok nga atong namatikdan nga manaygon mao ang pundok sa mga batan-on daw adik sa paggamit sa illegal nga drugas nga kalit lang mosakay sa molabay nga PUJ ug manaygon sa mga pasahero  dayong pangablit ug panguhit sa pagpangayo og sinsiyo nga kun malipat manguot ug manglabni og cellphone o pitaka.

Hinuon kini sila bisan dili panahon sa pagsaulog sa Pasko  kanunay na kini nilang gihimo nga mosakay sa PUJ ug mokanta ug magpahibalo pa nga dili sila kawatan, dili manglabni, manguot ug dili tulisan kay igo man kuno sila nga molingawlingaw sa gilaay nga pasahero nga malangan ang biyahe kay nasangit sa naghuot nga trapiko.