Isla Paraiso

Mitimbakuwas si Rey gikan sa gihigdaan nga kama. Gidali pag-ayo ang iyang kaugalingon atubangan sa salamin.

“Asa ka man?” matud ni Manang Teresita nga nakasigpat sa iyang pag-agi sa sala. “Panihapon na.” “Unya na lang,” niya pa, “inig-uli nako, Manang.”

Ug migawas siya sa balay. Mibarog siya sa daplin sa dalan, naghuwat og taksi nga kasakyan. Moadto siya sa kombento nilang sister Veronica.

Gipara ni Rey ang taksi nga nagdangadanga sa iyang nahimutangan. Paghunong niini sa iyang tungod, midali siya pagsakay.

“Sa Orchids Sisters Convent ta, bay,” giingnan niya ang drayber.

Ang drayber igo lang miyango dayon mitan-aw ngadto sa karsada sa unahan. Dayon misugod kini pagpadagan sa sakyanan.

Diha gayod mohunong ang taksi tungod sa gate sa Orchids Sisters Convent. Human kabayri ang drayber sa plitehan,  si Rey nanaog dayon sa taksi. Ug midali pagduol sa gate ug gitulpok ang buzzer.

Wala madugay, natukas ang gamay’ng lilianan sa puthaw nga sera sa gate ug nakita niya ang mata nga nagtan-aw kaniya. Wala madugay, natukas ang puthaw nga sera ug miguho ang usa ka ulo sa usa ka guwardiya.

“Unsay ato, Sir,” Gisukot siya sa guard nga mitutok pag-ayo kaniya. Nakasabot si Rey nga nakamay-ong ang guard kaniya sa iyang paghatod kang sister Veronica kaganina. Sa iyang pagtuo, mibati’g kahibulong ang guard kun nganong nahibalik man siya dayon sa kombento. -- Sumpayan pa