Uhaw sa pagmahal

Gitagbaw gayud nila ni Rudy ug Elma ang tagsa-tagsa nila ka kaugalingon.

“Ang tinuod bitaw Rudy, wala na g’yud makatuman si Lauro sa iyang marital obligation nako human siya mabaldado. Mora’g naapektahan ang iyang pagkalalaki human maputol ang iyang tuo nga paa,” kompisal ni Elma kang Rudy.

Human sa tulo ka oras nila nga “shortime,” mi-extend pa si Rudy hangtud nga kilum-kilum na sila nga migawas sa motel.

Sama sa gihapon, gihatagan ni Rudy og kwarta si Elma. Wala na magpanuko pa si Elma pagdawat. Sa laktud si Rudy na ang nagsuplay og salapi kang Elma hangtud nga nakabantay na niini si Lauro.

Diha’y higayon nga nakigsulti si Lauro kang Elma ug mitug-an nga nakasabot na siya nga nagbudhi kaniya ang iyang asawa. Apan walay mahimo si Lauro kay wala na man siya’y trabaho ug labaw na nga dili na makatuman sa iyang obligasyon kang Elma.

Dunay mga higayon nga makita ni Elma ang iyang bana nga maghinuktok. Tinuod, wala sila magkalisud-lisud sa ilang pagkaon apan ang kwarta gikan ni Rudy ug bugti niini mao si Elma.

Usa ka higayon nga gikang nagdeyt sila si Elma ug Rudy, daghang tawo sa balay nila ni Elma sa iyang pag-uli. Misugat kaniya ang balita nga naghikog si Lauro pinaagi sa pagmartilyo sa kaugalingon niya ulo.

Pwerte nga nakatiyabaw ni Elma. Gawas sa paghilak walay mga pulong nga migawas sa iyang baba. Nakasabot si Elma sa rason nga naghikog si Lauro.

Maayo nga pagkatipig ang baraha nila ni Elma ug Rudy. Wala gayo’y nakabantay sa ilang relasyon ug gani daghan ang nagpakisayud sa posible nga hinungdan sa paghikog ni Lauro.

Usa ka gabii, mitambong si Rudy sa bilar sa namatay’ng bana ni Elma apan wala gayud sila magpasabot nga adunay relasyon. Human sa paglubong ni Lauro, giapas ni Rudy si Elma nga miduaw sa lubong sa iyang bana.

“Uy, dia ka man lagi,” hinay nga pulong ni Elma nga mitimbaya kang Rudy. “Giapas ko ikaw dinhi Elma aron ubanan ka sa imong kasub-anan ug awhagon nga mobarug sa kamatuoran,” ni Rudy pa.

Gituktok ni Rudy ang lapida ni Lauro. “Part, patay ka na man g’yud, pangayoon na lang nako kanimo nga itugyan mo na lanng kanako si Elma. Akong ipasalig nga panggaon ko siya hangtud sa hangtod.”

Wala tuyoa nga nakahilak si Elma. Giagbayan siya ni Rudy ug gialam-alaman. “Ayaw kabalaka Elm, dili ko ikaw pasagdan ilabi na karon nga patay na si Lauro. I love you Elma,” ni Rudy pa.

Nagginaksanay sila si Rudy ug Elma atubangan sa lubong sa iyang bana. -- Kataposan