Isla Paraiso - Gula 15

Si Sister Veronica ang babaye nga maoy gihalaran ni Rey sa tim-os niyang pagbati sulod sa taas nga kutay sa panahon. Ingon sa gihadla siya sa katahom sa panagway sa babaye nga usa na ka madre. Matahom gihapon si Veronica, aw, si sister Veronica.

Mora gani’g misamot ang kaguwapa niini karon nga nagsul-ob na kini’g belo sa ulo.

Namalikhaw sa panumdoman ni Rey ang mga panahon nga nanglabay. Kadtong panahon nga masubsob niyang paghalad sa gugma kang Veronica. Hataas ang kutay sa iyang pag-antos. Apan gidawat niya sa tumang kaligdong ang iyang kapakyasan sa gugma sa dalaga sa dihang si Jonathan ang palarang lalaki nga gisugot niini.

Apan mao ba kahay latid sa kapalaran, wala magkadayon sila si Veronica ug Jonathan kay namatay man kini tungod kay nasakit.

Dinhi nabanhaw ang paglaom ni Rey nga maangkon ang gugma ni Veronica. Pagligdas sa pipila ka bulan human sa kamatayon ni Jonathan, gisugdan ni Rey ang paghalad sa iyang gugma ngadto sa dalaga. Nagtuo si Rey nga dako na kaayo ang paglaom nga maangkon niya ang gugma ni Veronica.

Apan napakyas gihapon siya. Kun unsa kasubsob ang iyang pagpangaliyupo sa gugma sa dalaga, mao usab ang pamalibad nga gipadayag niini kaniya. Wala ug dili gyud si Rey mahikalimot sa mga pulong sa dalaga nga nakapalong sa nahaling nga pamasin sa iyang paninguha sa gugma niini.

“Gikasubo ko, Rey,” nagkanayon si Veronica niadtong tungora sa ilang panagsulti. “Ang tinuod nakadayeg ako sa imong kabuotan. Mituo usab ako sa katim-os sa imong pagbati nga gihalad kanako. Apan dili ko katudloan ang akong kasingkasing sa paghigugma kanimo.” -- Sumpayan pa