Uhaw sa pagmahal - Gula 1

Malampuson g’yud nga nadala ni Rudy si Elma sa iyang gipuy-ang panimalay diha sa Barangay Kinasang-an. Dugay ra kaayo nga gipaabot ni Rudy kining mao nga higayon kay kaniadto ra siya nga naibog ni Elma.

“Una nga higayon nga nakasala ko sa akong bana Rud,” giingnan ni Elma si Rudy dihang didto na sila sulod sa kwarto sa iyang silingan. Kun wala pa magkinahanglan og kwarta si Elma dili gayud niya budhian ang iyang bana.

Adunay kapuyo si Elma -- si Lauro. Apan gidemalas si Lauro kay dihang nagmotor kini paingon sa iyang trabahoan usa ka adlaw niana naaksidente kini dihang nadam-agan og usa ka taksi.

Nabaldado si Lauro ug natangtang sa iyang trabaho. Dinhi magsugod ang problema ni Elma tungod kay siya na lang ang gisaligan nga mabuhi sila si Lauro.

Dunay gamay’ng tindahan sila si Lauro ug Elma apan ang ganansya nila matag adlaw dili gayud makasapar sa ilang panginahanglan. Usa ka adlaw, paingon si Rudy sa iyang opisina ug nagkaabot sila si Elma nga nag-atang og PUJ.

“Kumusta Elm? Ok na ba si Lauro?” pasiuna ni Rudy ngadto sa babaye nga iyang naibgan. “Mao lang gihapon dili na man g’yud siya makalakaw. Lisud mi kaayo kay karon gani kinahanglan ko og kwarta,” matud ni Elma.

Gibati’g kalooy si Rudy ngadto kang Elma. Gikuot ni Rudy ang iyang pitaka ug gikuha ang tulo ka tagsa ka libo ka pesos ug gitunol kini ngadto kang Elma.

“Dawata ni Elm, magamit nimo kini pagsulbad sa imong problema,” giingnan ni Rudy si Elma. Kadawaton-dili si Elma sa gitunol nga P3,000 ni Rudy, apan giingnan siya ni Rudy nga dili maikog pagdawat sa iyang gihatag.

Wala’y nahimo si Elma gawas sa pagdawat sa gihatag nga kwarta ni Rudy, “Salamat g’yud kaayo Rud ha? Unsaon kaha nako pagbawos nimo niining daku kaayo nimong tabang kanako,” ni Elma pa.

Gipahiyuman ni Rudy si Elma. “Kun magkinahanglan ka sa akong tabang Elm, ayaw kataha pagduol kanako.” Imbis nga moadto si Elma sa iyang amiga kay manghuwam og kwarta, mideritso na lang siya sa doktor.

Milabay ang mga adlaw. Nagkaabot sila si Elma ug Rudy sa karenderiya ni Nang Damasa kay nagpalit og sud-an si Elma. Mabasa ni Rudy nga nindot kaayo’g tinan-awan kaniya si Elma.

“Iapil na lang sa akong bayranan ang gikuha ni Elma nang,” giingnan ni Rudy ang tag-iya sa karenderiya. “Salamat g’yud Rud ha? Daku na g’yud kaayo ko’g utang nimo,” matud ni Elma.

Nagdungan sila’g biya sa karenderiya si Rudy ug Elma. “Sige Rud ha, estorya lang ta sa sunod kay nagdali ko karon kay mobalik ko sa doktor.” - Sumpayan