Awit ug gugma - Gula 3

Puwerte nga nakapasalamat ni Maridel nga wala siya mahago paglakaw kay gipasakay man ni Edgar sa iyang kotse. Wala pa mangabli ang department store nga gitrabahoan ni Maridel mao nga nagkalingaw usa sila’g estorya sulod sa bugnaw kaayo’ng kotse sa jailguard.

“Kanus-a ba ang imong day-off Del?” pangutana ni Edgar sa amiga niya nga salesgirl. “Sabado. Ngano man Gar?” bawos-pangutana sa dalaga. Gitug-anan ni Edgar si Maridel nga nagplano siya nga makigpanuroy atul sa iyang day-off aron sa paglingaw-lingaw.

Wala dayun motubag si Maridel nga klaro kaayo nga adunay gihuna-huna. “Manglaba man gud ko atul sa akong day-off Gar, sori lang kaayo.” Miyango-yango si Edgar apan may misantup sa iyang huna-huna.

“Unya na kita manuroy ini’g human nimo’g panglaba. Adtoon tika sa imong gipuy-an Del, mga hapon na lang,” matud ni Edgar nga mora’g dili magpabalibad.

Tuod, mitangdo na lang si Maridel. Gitug-anan sa dalaga si Edgar kon asa dapit ang iyang gipuy-an. “Sige moadto na ko Gar kay nanulod na ang mga empleyado sa employees entrance sa unahan,” ni Maridel pa nga mibukas sa pultahan sa kotse.

“Wala la’y kiss?” matud ni Edgar nga nagngisi dala ang komedya ngadto sa salesgirl. “Pag-syor  diha uy,” dali nga tubag ni Maridel nga molingi kang Edgar nga nagpahiyom.

Gisundan ni Edgar paglantaw ang nagkalayo nga bayhon ni Maridel hangtud nga nahanaw kini sa iyang panan-aw pagsulod na sa employees entrance. Nakahukom si Edgar nga panguyaban niya ang salesgirl. Pagka Biyernes sa gabii, walay lingaw si Edgar. Nakahuna-huna siya nga kuhaon niya si Maridel sa gitrabahoan niini nga department store aron usab siya makatultol na inig-adto niya sa gipuy-an inigka-ugma.

Giparada ni Edgar ang iyang kotse duol sa employees exit. Hapit na ang alas nuybe sa gabii ug tinggawas na sa mga kawani. Migawas si Edgar sa iyang kotse aron makita dayon niya si Maridel ini’g gawas na sa exit.

Tuod, nalantawan na ni Edgar si Maridel nga mi-claim na sa iyang gibilin nga mga butang didto sa locker room. “Hi Del!” timbaya ni Edgar sa dalaga dihang migawas na kini sa exit.

“Uy, dia ka lagi Gar?” smiling kaayo si Maridel nga mibawos pagtimbaya kang Edgar.

Gipasakay ni Edgar si Maridel sa kotse. “May giandam ba nga pagkaon didto sa giabtan nimong balay Del?” sukna ni Edgar sa salesgirl. “Wala lagi, magpalit ra ko karon og barbecue ug puso, fight na,”dali nga tubag ni Maridel.

Mipasirit si Edgar sa Fuente Osmeña. Tumong niya nga adto na lang sila mangaon sa Larsian. “Dinhi na lang ta mangaon Del, maayo dinhi kay makapili ta. Bangkahan tika karon Del,” matud ni Edgar. - Sumpayan