Kapon

Lima na ang mga anak ni Elorde ug Monay. Nakahunahuna si Elorde sa pagpakapon nga wa mananghid sa iyang asawa. Ania siya karon sa klinika sa iyang higala nga si Dr. Jack.

Lisud man gud kuno’g mapun-an pang ilang mga anak, kay nagkadako na ra ba kuno kini. Nagkadako sab ang kaon. Nagkadako ang bayranan sa pagtuon. Grade V, Grade IV, Grade III, Grade II ug Grade I, naa ra ba kuno ning iyang mga anak.

Bisa’g sa public school kini niya gipantungha apan dako gihapon siya’g gasto sa notebooks, lapis, ballpen, papel, bag, krayola, ruler ug sa mga bawon. Naa pay bayranan sa mga projects. Uniform pa gyud diay! Sapatos, medyas.

Unya ang bayranan pa sa tubig nagkadako na. Daghan na gud silang maligo. Daghan nang labhanan. Daghan nang  hugasan. Siyempre, apil po’g kadako ang gasto nila sa sabon, toothpaste, tissues ug cotton buds.

Samotan pa kung dunay usa nila nga masakit, makagasto na po’g dako palit ug mga tambal sama sa tabletas. Gani, aron makamenos sila sa gasto, sa iyang pagkalibang sa C.R. manglaba siya’y usa ka sinina nga iwaswas sa usa ka baldeng tubig para i-flush sa inodoro, kay sa i-flush lang kini nga puwerte pang tin-awa. Unya aron makamenos pa gyud sila sa gasto. Ang sabon nga ilang gamiton sa panglaba sa bulingon ug panghugas sa plato, mao pud intawoy iyang gamiton isabon ig-kaligo ug ipanotbrush. Pila ra gud kunoy iyang suweldo, isip janitor sa usa ka Mall.

Ang iyang asawa housewife. Kay gusto niya mao lang kini moamuma sa ilang mga anak ug kaniya ibabaw sa kama. Guwapa kaayo kining iyang asawa, makawa sa iyang kaluya.

“Human sa akong masusing examinasyon, Bay, Elorde, puwede ra kang di kapnon,” matud ni Dr. Jack, nga nagbasa sa resulta nga nahisulat sa folder.

“Ngano man, Dr. Jack?” ni Elorde nga mitingkag ang dunggan. “Dili kana puweding kaponon kay sterile ka man!” ni Dr. Jack, nga nagpanglingo. Nagpanakla.

“Unsa!!!” miinat ang kilay ug tingog ni Elorde. Wa siya katuo. (Katapusan)