Napoles ginhawaan isog, way konsensiya

Ang mga hunahuna nga gipadayag dinhi iya ra sa tagsulat ug walay labot ang Banat News ug mga sakop niini.

Ang tubag ni Janet Napoles sa mga pangutana nga gibato kaniya sa mga Senador nakapahinumdom nako niadtong dula-gimik nga gipasinati ni Tatay Andot sa Grade 1 pa ko. Simple lang ang maong dula. Matud ni anhing Tatay, kutob sa unsay iyang ipangutana, kinahanglang usa ra gyu’y itubag ko — “Dili!”. Sa higayon nga lain ang akong itubag, pilde na ko!

Gisugdan dayon ni Tatay ang maong gimik pinaagi sa pagsukna: 1.) Mokaon ka ba’g sili? Tubag dayon ko: “Dili.” 2.) Gusto ka bang bunalan pirme? Akong tubag: “Dili.” 3.) Unsay gusto mo inig Pasko, kuwarta o dulaan? Tubag: “Dili” gihapon. 4.) Kinsay ngan nimo? Tubag: “Dili.” Basta, bisag unsa pa kadtong isukna ni Tatay, “Dili” gyu’y akong isulti. Hangtod nga dihang gitunol na ni Tatay ang kuwarta, iya na pud kong gipangutana: “Modawat ka ining ihatag ko nimo?” Haskang dalia nakong nakaingon: “Dili” aw, resulta? Wa idayon paghatag ni Tatay ang premyo.

Mao sab kini ang gitudlo sa mga abogado ni Napoles ngadto niya. Gikondisyon daan ang iyang hunahuna nga kutob sa unsay ipangutana panahon sa imbestigasyon didto sa Senado, dapat duha ray iyang itubag: “Hindi ko alam” ug “Hindi po yan totoo.”

Ug hingpit nga gituman kini sa wala’y konsensiya nga Napoles. Usa sa mga Senador, Miriam Defensor Santiago, kinsa wala makaagwanta sa kagahi’g ulo ni Napoles, mipadayag nga ang maong tubag dili gyud maisip nga tukmang tubag sanglit wala man kini makaablig makapakita sa gitagoan nga kahayag. Gipasabot pa siya ni Miriam nga kining kasong gisang-at batok ni Janet, dili usa ka criminal case; kun dili, usa ka administrative case. Busa gigiyahan siya sa Senadora unsa ang mas husto nga itubag? Ug mao kini- “I invoke my right against self-incrimination.”

Tuod man, gidawat sa akusado ang tanyag sa imbestigador. Gibag-o ang iyang tubag. Imbes ‘Hindo ko alam’, I invoke my right...’ na, diin halos ra magkapareho ang kahulogan. Ang nakadeperensiya lang, matud ni Miriam, kay kini nagpasabot nga ang akusado adunay kasayoran bahin sa hitabo apan hadlok lang motug-an kay basin pa unya siya’g makasohan ug madamay.

Hangtod naserado na lang ang unang imbestigasyon sa Blue Ribbon Committee, nagpabiling kutob sa mga alegasyon lang gihapon ang mga pasangil nga giyagyag sa whistle blowers ngadtong Napoles. Malampuson ang Senado sa pagpresentar ni Napoles sa publiko, apan pakyas sila pag-abli sa baba niini nga klaro kaayong gikandadohan sa kahadlok, pagduhaduha ug kabug-at sa nagkalainlaing yawan-ong kusog nga miulipon sa iyang balatian.

Sa natad sa boksing, kun dili na mobawos pagsuntok ang boksidor sa kaaway, kinsa mipaulan niya’g makabungog nga kinumo, hunongon sa repire ang away ug iyang ideklarar nga pilde sa Technical knockout decision ang nahadlok nang mosukol nga kontra, kinsa igo na lang nagpatara sa mga un-answered punches.

Basig nagtuo si Napoles nga kining dili niya pagtubag og tarong sa mga pangutana, makaluwas sa higanteng kaso nga gisang-at batok kaniya. Dinhi siya masayop. Kay kun dili siya kaantigo mosukol pinaagi sa pagpanalipod sa iyang side, sama ra nga giangkon niya daan ang klarong kapildehan.

Ug sama sa repire sa boksing, mao sab unya kini ang ihukom sa maghuhukom sa hukmanan ngadto ni Napoles.