Bag-ong raket

Bag-o lang nakagawas sa prisohan si Anas. Napriso siya’g lima ka tuig kay nakonbikto sa kasong estafa. Di na unta siya gustong mabalik pa sa prisohan di na sab unta siya gustong mangilad. Apan wa man sab siya’y laing trabahong nakamahoan way modawat bisa’g unsang trabaho sa buhatan sa gobiyerno o pribado, tungod kay kulang og grado samot na ron nga duna na siya’y bad record ex-convict na siya nakahunahuna siya’g bag-ong raket.

Nag-estambay siya sa eskina sa dalan A.S. Fortuna ug M.C. Briones nagtakingking siya nga naglakaw iyang gipalutaw nga duna siya’y depekto sa tuong batiis usa ra ka tiil iyang gigamit sa paglakaw wala ug ang tuong tiil, iyang gialsa ubos la’g diyutay sa walang tuhod. Daw may polio ang tuong batiis mag-untol-utol siya sa iyang linakwan nga usa ra ka tiil nga gigamit nagpakilimos siya.

Dihang stop light na ang dalang A.S. Fortuna, nag-untol-untol siyang niduol sa multicab depasaheroan nga puno sa pasahero. Gikangkang niya ang tuong kamot nagminghoy iyang nawong nga nagpakiluoy nanan-aw ang mga pasahero niya.

“Naa koy nailhan bay tawo nga way mga kamot wa man magpakilimos” sa usa ka pasaherong lalaki. Naglingkod sa walang habig sa multicab nangyamiid nga nitan-aw sa kaatbang niyang pasahero.

“Naa koy nailhan bay, way mga tiil apan wa man nagpakilimos!” matud sa lalaki nga atbang sa unang nisulti.”

“Grabe gyud to akong kaila, bay!” timang sa tupad sa ikaduhang lalaki nga nisulti. Dapit sa tuo.

“Way kamot, way tiil, apan wa magpakilimos!” Wa gyu’y nanghatag sa mga pasahero.

Nagtinan-away lang sila ug nagpasiklap dalang yami-id ngadto ni Anas.

Ni-berde na lang ang traffic light wa gyu’y nihatag ni Anas nag-untol-untol na lang siya padulong sa daplin sa karsada. Nakahukom siyang mobalik na lang sa karaang raket. Bahala’g mabilanggo siya’g usab total sa sulod libre siya’g kaon ug katulganan. (Kataposan)