Ang gugma ni Angelie

Mikisdom ang panagway ni Keven sa dihang wa niya damha ang gisulti ni Angelie kaniya, “magbuwag na lang kita Keven tungod kay gusto ni mama ug papa nga wala ako’y hinigugma samtang magtungha pa ako.”

Ingon sa liti sa udtong tutok ang mga pulong ni Angelie. Nasayod na si Kevin nga supak ang mga ginikanan ni Angelie, dili lang tungod kay makahasol kini sa pagtungha ni Angelie, kun dili tungod kay ubos ang pagtan-aw sa mga ginikanan ni Angelie kang Kevin, tungod kay siya kabus ug sila adunahan.

“Apan kumusta ang atong gugma?” Prangkang sukna ni Kevin kang Angelie.

Milugmaw ang mga luha ni Angelie. Pasayloa ako Kevin tungod kay kagustohan kini sa akong mga ginikanan.

Pebrero 14, 1967, ang tunghaan naghimo og acquaintance party pahinungod sa mga Srs. ug Jrs. nga mograduwar nianang tuiga.

Ang kalihokan nagtumong nga mahimamat sa mga Srs. ang mga Jrs. nga mamahimong Srs. sa sunod tingtungha. Dugang tumong sa kalihokan mao ang pagpili kong kinsa ang koronahan nga mamahimong King and Queen of Hearts sa acquaintance party. Puno sa kamabulokon ang kalihokan. Ang tanan naghinamhinam kun kinsa ang mamahimong King and Queen of Hearts.

“Ang atong King of Hearts mao si Kevin Silab sa Srs. class ug si Ms. Angelie Ersando mao ang atong Queen of Hearts sa Jrs. class.” Human giproklamar si Kevin ug Angelie ni Ma’am Binoong, misunod dayon ang masipang hugyaw sa tanang estudyante.

Human sa koronasyon gihangyo si Mr. Kevin Silab ug si Ms. Angelie Ersando sa pagsayaw ibabaw sa stage. Ug samtang sila nagsayaw, wa kapugngi ni Kevin ang iyang gibati kang Angelie “I love you Angelie.” Ug didto nagsugod ang ilang relasyon, apan dakong supak ang mga ginikanan ni Angelie.

Human sa graduation miadto si Kevin sa Manila. Si Angelie sa iyang bahin nagpadayon sa iyang pagtungha dinhi sa siyudad sa Sugbo hangtod nga natapos niya ang kurso sa Medisina.

Tungod kay maanyag si Angelie daghan ang mihalad sa ilang gugma ngadto kaniya. Apil kanila mao si Dr. Ram Amotan nga kauban niyang doctor sa iyang gialagaran nga tambalanan sa siyudad sa Sugbo ug si Alberto Pongco nga usa ka manlalaban, silang tanan wala panumbalinga ni Angelie.

Human sa lima ka tuig sa pag-alagad ingon nga mananambal sa usa ka pribadong tambalanan milalin siya sa laing nasud nga mao ang Tinipong Bansa sa Amerika.

Human sa daghang katuigan mipauli si Kevin sa among lungsod nga mao ang Buhing Bato. Among nasayran nga si Kevin usa na ka manlalaban. Nakapadayon diay siya isip working student uban sa pagtugot sa negosyanteng magtiayon, nga nagsagop kaniya.

Naminyo si Kevin, adunay usa ka anak lalake nga tapos na sa iyang pagtuon. Ugaling lang kay ang iyang asawa patay na tungod sa kanser sa totoy.

Human masayran ni Kevin nga si Angelie tua sa Amerika, mihukom siya nga moapas didto.

Human sa pipila ka mga bulan among nasayran nga si Atty. Kevin Silab ug si Dra. Angelie Ersando, nahiusa sa kaminyoon sa Los Angeles California sa edad nga 55 ug 56.

Ang kaminyoon ni Kevin ug Angelie nagpakita nga ang tinuod nga gugma molahutay sa mga pagsulay sa daghang katuigan. Kini usab nagpakita nga ang tinuod nga gugma dili gayod mapakyas. (Kataposan)