Ang call boy

Gula 2

Giduol g'yud ni Mariano ang lalaki nga matud pa usa ka callboy nga kaganina ra'ng nagbarug og nga ingon sa adunay gipaabot sa eskena Osmeña Boulevard ug Colon.

"Brod, ako si Mariano, taga Bohol ko ug dia karon sa inyong lugar sa Cebu aron manarbaho, apan giingnan ko sa usa ka babaye nga makatabang kuno ka nako kay lisud kaayo ang pagpangita'g trabaho," matud ni Mariano dungan sa pagtunol sa iyang kamot.

Nahibulong kaayo ang lalaki kun ngano nga siya man ang makatabang ni Mariano nga makakita'g trabaho. "Pareho 'sab ko nimo bai dihang una ko nga miabot dinhi sa Sugbo kaniadto. Taga Leyte 'sab ko ug buot unta manarbaho apan walay nasudlan," matud sa lalaki.

Nagpaila ang lalaki kang Mariano nga siya si Elmer. "Unsa diay imong trabaho karon bai Elmer nga disente ka man kaayo, long sleeve ka man gani ug sinaw kaayo'g sapatos?"wala makapugong si Mariano sa pagpangutana.

"Wala ka diay tug-ani sa babaye nga nagtudlo nimo nako kun unsay akong trabaho?" sumbalik-pangutana  ni Elmer ngadto ni Mariano. "Basin gibinuangan lang ko sa babaye ug maka-insulto lang unya ko nimo," dali nga tubag ni Elmer.

Gitug-anan ni Elmer si Mariano nga kay wala man dayon siya makakita'g maayong trabaho dinhi sa dakbayan, adunay nakasulti kaniya kaniadto nga mag-callboy na lang siya ug hangtud karon nagpabilin siya sa mao nga trabaho.

Walay pupamilok si Mariano nga mitutok ni Elmer samtang nagsaysay sa iyang kaagi kaniadto nga susama sa iyang nasinati karon. "Para nako Mar, oki ra man 'sab ang pagka callboy kay dali ra'ng kwarta. Usahay lang pareho karon wala mogawas ang akong mga customer."

Samtang nagsultihanay sila si Elmer ug Mariano, ilang nakita nga mitabok sa karsada ug mipaingon sa ilang nahimutangan kadtong babaye nga maoy nagtudlo ni Mariano nga paduolon kang Elmer.

"Unya nagkasabot na mo? Tabangi na siya Mer kay pareho mo'g kaagi kaniadto. Mentras wala pa siya'y kapuy-an dinhi sa siyudad dad-a lang usa kana siya sa imong giestaran nga balay Mer," matud sa babaye.

Miyango si Elmer. Nalipay kaayo si Mariano nga mahigalaon diay kaayo si Elmer nga pagkatawo."Malas ta karon Mar, walay kustomer," nagpanglingo-lingo si Elmer. "Ako 'sab wala pa g'yud maka-kustomer," matud sa babaye.

Nanakay og jeep sila Mariano ug Elmer. Pag-abut nila unahan sa Kapitolyo, nanganaug sila. Gisuot nila kadtong gamay'ng dalan-dalan ug didto sila misangko sa silong sa usa ka balay.

"Mao kini ang akong gipuy-an Mar, dia ta karon sa Capitol Site," giingnan ni Elmer ang bag-o niyang higala. - Sumpayan