May paagi ang kalag

Niabay si Chona sa lubong sa iyang hinigugma nga si Danny. Sakit unta sa iyang dughan ang nahitabo sa uyab. Apan gidawat na lang niya. Kun maoy hukom sa kapalaran o pagbuot sa Kahitas-an, wa siya’y mahimo. Gani may mga asawa nga makadawat sa kamatayon sa ilang bana. Siya pa kaha ang dili, nga uyab man lang? Nibilar siya’g usa ka gabii. Unya nihatud sa pahulayang dayon.

Nianang pagkasayong hapon, paghuman sa lubong, magul-anon si Chona nga nihinay og gawas sa gate sa sam-ang.

“Giunsa nimo pagkasayod sa hitabo ni Danny, Chon?” May nangutana niya sa iyang likod nga nipikpik sa iyang tuo nga abaga. Nilingi siya. Si Eric diay ang nangutana. Suod nga ig-agaw si Eric ni Danny.

“Nianang unang gabii nga gihaya si Danny, sigeng bagting akong selpon. Kun akong tubagon, way motingog. Miss call pirmi. Unya nakita nako nga ang mga tawag gikan sa selpon ni Danny”, ni Chona.

“May paagi gyud ang kalag”, ni Eric.

“Duna gyud,” ni Chona.

“Busa, nagpakisusi na lang ko sa mga kauban ni Danny sa trabaho. Diha na ko nasayod sa hitabo,” dugang ni Chona.

“Unsa may nasayran nimo?” ni Eric.

“Gitulis ang banko ilang gigwardiyahan. Usa siya’s napusilan sa tulisan” ni Chona. Nanghupaw. Niyango si Eric. Masulob-ong  nagsud-ong sa dalaga.

“Sa panahon sa imong pagbangutan, kun magkinahanglan ka’g higalang kahinabi, ayaw pagpanuko og tawag nako”, ni Eric. Makahuloganon iyang pulong ug tinan-awan sa dalaga.

“Salamat, Eric. Pahibaw-on ra unya tika. Kun maka-move-on na ko”, ni Chona. Nipara og taksi daplin sa karsada. Nisakay. Nasayud siya nga may pagtan-aw kaniya si Eric. Apan nagrespeto lang sa ig-agaw. Gisundan si Chona og tan-aw sa ulitawo. (Katapusan)