Nakit-an sa bolsa

Dear Tita Salie,

Maayong adlaw. Tagoa lang ko sa ngalan nga Chuchai, 17 years old. Dili pa ko minyo apan duna na koy kapuyo karon.

Nagproblema ko niya, Tita, tungod kay sobra kaayo siya ka seloso. Kanunay na lang mi mag-away tungod kay daghan kaayo og bawal. Daghan kaayo siya og gidili diri kanako.

Kusog pud kaayo siyang moinom ug usahay dili siya mouli sa amoa kay adto siya matulog sa iyang tiyo. Mosugot ra man unta ko nga mag-inom siya basta dili lang siya mokuyog sa iyang mga barkada. Nahadlok lang ko, Tita, kay ang iyang mga barkada pulos manuyopay. Ug dihay kausa nga duna ko’y nakit-an sulod sa iyang bulsa. Dihang ako siyang gipangutana matud niya nga shabu kuno kadto.

Naa man unta koy uyab, Tita, nga Amerikano, ug hapit  na siya mobalik dinhi sa Pilipinas. Ako na lang kahang biyaan kining akong partner ug hulaton ang pag-abot sa Amerikano. Pero love man kaayo nako ang akong partner, Tita. Unsa may akong buhaton? Palihog pasabta ko. Thank you and more power.

* * *

Good day,

Kabata pa nimo aron mag-antos sa maong sitwasyon. Kabata pa nimo aron puy-an ang kinabuhi sa asawa nga puno sa kunsimisyon tungod sa iyang badlongon nga bana. Sayo ra gyud kaayo kang misulod nianang matang sa kinabuhi nga ang angayan unta kanimo mag-enjoy pa una sa kinabuhing dalaga. Dapat karon nag-eskuyla pa unta ka ug kauban pa nimo ang imong pamilya. Pero makapangutana ko nimo kun nganong mitugot man ka nga puy-an ang problemadong kinabuhi.

Sulod sa akong kasingkasing gusto gyod ko nga luwason ka ug haw-ason gikan sa imong nahimutangan karon nga kalisdanan. Busa ako motambag kanimo nga biyae kanang maong relasyon tungod kay dili kana mohatag og kalipay diha kanimo. Hunahunaa kun angayan ka ba sa maong sitwasyon, hunahunaa kun wala na bay laing lalaki nga responsable ug andam mohatag kanimo og gamay nga ginhawa sa kinabuhi. Tan-awa pag-ayo kun wala na bay laing lugar nga puy-an gawas diha sa imong nahimutangan, wala na bay laing gugma gawas nianang pagbatia.

Suroy kuno ug iliraw ang imong mga mata, aron imong makit-an ang nindot nga kalibotan ug dili sama nianang imong nahimutangan. Timan-i nga puyde nimong usbon ang dagan sa imong kinabuhi ang tanang desisyon magagikan gyod sa imong kaugalingon. Sakit alang kanako kun kanang maong relasyon imong ipadayon. -- Tita Salie