Mangayo og load

Dear Tita Salie,

Have a nice day. Just cal me Ms. Virgo, minyo nako, Tita, ug naproblema ko niining akong bana. Wala man unta’y problema ang among pamilya tungod kay buotan kaayo kining akong bana. Gawas nga buotan kugihan pa gyod kining motrabaho ug mangita og kwarta.

Pero naglagot lang gyod ko kaniya tungod kay ka usa akong nasakpan nga dunay babaye nga nagsige og text kaniya unya magsige ra ba og pangayo og load. Dihang ako siyang gi-confront mahitungod niini, matud niya nga binuang lang kuno ang iyang pagtext-text sa maong babaye ug wala pa kuno siya makakita niini.

Naglagot ko, Tita, kay dili man gani ko niya tagaan og load nga ako ang iyang asawa pero ang babaye nga wala ko masayod taga diin ni siya iya na hinoong loadan.

Tungod sa akong kalagot ako siyang gipalayas kay naghatag lang siya og bwisit sa among pagpuyo. Pero dili pud molayas, Tita, kay matud pa niya “asa man pud kuno siya paingon kun molayas siya.” Palihog pasabta ko og tabangi ko kun unsay angay nakong buhaton. Thank you so much and may God bless you always in all your endeavors.

* * *

Maayong adlaw,

Dili bag-o alang kanako ang imong gipaambit nga sitwasyon. Tungod kay daghan kaayo karon sa atong mga kaigsuonan nga walay laing lingaw kun dili ang pagtext-text ug tawag sa celfon. Unya ang ka-textmate nga babaye kun imong tubagon mopadayon usab pag-text kun imo siyang padad-on og load. Busa ang lalaki nga walay lingaw mosugot ra usab ug mopadala dayon og load sa ilang textmate aron usab padayon ang ilang paglingaw-lingaw. Tinuod nga lingaw-lingaw lamang kini apan ang problema kay sayang man ang kwarta.

Bisan lingaw-lingaw lang apan dunay uban nga ilang gitinuod dili lamang sa text sila nag-uyab-uyab kay ang mga lalaki usahay mogasto man og pamasahe aron gyod ilang makit-an ang ilang ka-textmate.

Yes, sa sinugdan text-text  lang pero kun pul-an na sila og sige og text, motawag na sila nga mas mahal ang bayad ug mas modako ang gasto. Kun pul-an na usab sa tawag gusto na usab nilang magkita ug dinhi na unya magsugod ang mas dakong problema.

Ayaw lang una palayasa ang imong bana. Tagai lang una siya og higayon nga magbag-o tungod kay ang pagpalayas medyo dako ra nga silot alang sa iyang nabuhat nga sala. Hinuon, kanunay lamang bantayi ang imong bana, kay ang satanas padayon gyod nga motental kaniya. - Tita Salie