Maria Magdalena Gula 229

Samtang atua pa sa layo si Neggar, padayon ang akong pagtuon og drive sa sakyanan ni Neggar. Hangtod nga makamaneho na ko.

Usa ka adlaw niana samtang gikan ko sa S & R sa may reclamation, sa akong pagpaingon sa maong store kalit lang namatay ang makina sa akong sakyanan. Wala ko masayod kun unsay akong buhaton.

Gibati ko ang tumang kapikal. Naproblema ko kun unsaon nako. Walay shop sa duol nga akong nakita, sa akong nahimutangan. Ug dili ko maantigo mosuong kun unsay angay ayohon sa sakyanan. Taudtaod gyud kong nagbarog sa daplin sa dalan duol sa akong sakyanan. Nagpaabot ko nga adunay mahiagi nga puwedeng kapangayoan nako’g tabang ug mapalihog aron matan-aw ug unsay problema nganong mikalit og kapatay ang makina.

Apan ang mga motoristang nahiagi ingon sa pulos nanagdali. Misulay ko’g pangayo’g tabang sa mga driver ug konduktor sa mga PUJ nga miagi sa akong tungod apan igo lang ko nilang gibugalbugalan. Nakasabot kong mas importante alang nila ang ilang pagpamasahero.

Sa kadugayan, dunay taxi nga hinay nga nagdagan, mura og nangita pa og pasahero. Gisulayan nako’g para. Nihunong kini sa akong tungod. Nanaog ang driver nga anaa sa 30 anyos ang pangidaron. Wala siya’y pasahero. Miduol dayon siya sa akong nahimutangan duol sa akong sakyanan.

“Naunsa man na Ma’am? Unsay problema? Gipangutana ko sa driver. -- Sumpayan pa