Bar dancer - Gula 5

Wala g’yud tuod gipakita ni Philip ang nakuha niya nga video footage sa pagsayaw ni Joan nga nagpakita-kita sa pribado’ng parte sa iyang lawas ngadto sa mga kustomer sa Wild Orchids Bar sa wala pa kini rondaha sa taga City Hall.

Gipasakaan sa kapolisan og kaso si Joan ug ang floor manager sa bar, apan wala madugay gi-dismiss ra kini sa piskaliya tungod kay wala may lig-ong ebidensya.

Kadto maoy nakapasuod g’yud pag-ayo nila ni Philip ug Joan. Nahimo na nga girlfriend ni Philip ang bar dancer ug usahay dunay mga higayon nga dili niya kini pasayawon kun ganahan siya nga makigdeyt sa dancer.

Apan miabot ang panahon nga gipul-an na ang palakero nga si Philip kang Joan. Panagsa na lang siya mokontak sa bar dancer ug wala na usab siya mag-adtoan sa Wild Orchids Bar.

Lahi na usab ang tirada ni Philip. Usa ka higayon gikakita ni Philip ang higala niya nga si Randy. “Wala na baya mag-dancer si Joan bai Philip kay mora’g gilaayan kuno nga wala ka na magpakita niya,” ni Randy pa.

Wala lang hatagi og pagtagad ni Philip ang gi-report sa iyang higala. Naanad na siya nga magpuli-puli lang ang iyang girlfriend kun mapul-an na siya sa usa.

Gitug-anan ni Philip ang iyang higala nga usa ka gwapa nga anak ug opisyal sa DILG maoy iyang gikursonadahan ning higayona. “Gwapa kaayo part, basta kay kun mosugot lang lagi ni, pangasaw-on nako,” iyang giingnan si Randy.

Nagkasabot ang mag-amigo nga bisitahan nila si Emerald didto sa ilang balay nga dili layo sa Kapitolyo.

Tuod, giabi-abi ni Emerald si Randy ug Philip nga daw nataha kaayo kay dili man diay basta-basta ang pagkabutang nila ni Emerald. Buotan kaayo kini nga miabi-abi kanila.

Taud-taud, miabut ang amahan ni Emerald ug gipaila-ila sa dalaga ang duha niya ka bisita. Maayong tawo ang amahan ni Emerald ug misamot nga nakagusto na g’yud kaayo siya sa dalaga.

“Ka swerte diay nimo part kun sugton ka ni Emerald kay matabangan ka pa sa iyang Papa nga makasulod og trabaho sa DILG,” komedya ni Randy. Mingisi lang si Emerald. Mitingog ang buzzer sa gawas, nagpasabot nga dunay tawo sa gate.

Gitindog ni Emerald. “Maayo kay dia ang akong ig-agaw, akong ipaila-ila ninyo, gwapa ra ba ni siya kaayo.” Nagtinutokay ang duha ka maghigala. “Maayo kay duna ko’y ako’ng ika-estorya bai,” matud ni Randy.

Pagbalik ni Emerald kauban na niini ang iyang ig-agaw. Napasiga ang mga mata ni Philip kay si Joan diay ang miabot. - Sumpayan