Maria Magdalena - Gula 227

Matag semana, gahinan gyud nako’g panahon ang pag-adto sa Casino sa Mactan. Usahay mokuyog nako si Bob.

Samtang nagsige ko’g lakaw, akong nakaila si Godfrey nga chief security guard sa Gaisano Mactan. Nakigsuod siya nako. Hangtod nga iya kong gipangulitawhan. Tungod ba kaha sa kahumok nako’g ilong, gisugot nako si Godfrey, sa wala’y paghunahuna nga tungod sa akong gibuhat posibleng makomplikado ang akong kinabuhi sa kapulihay.

Ang importante alang nako ang mag-enjoy sa akong kinabuhi ug wala koy paki-alam sa uban.

Wala gililong ni Godfrey kanako nga duna siya’y asawa ug mga anak. Apan wala kining maong kamatuoran makapugong nako sa pagpakigrelasyon kaniya. Mora mi’g mga magnet nga mi-attract sa usa’g-usa.

Wala ko makabalibad ni Godfrey dihang usa ka higayon niana gidala ko niya sa usa ka mabugnaw’ng lawak. Didto gikatugyan ko kaniya ang akong kaugalingon. Naangkon niya sa hingpit ang akong pagka-babaye.

Ug ang nahitabo namo nasubli sa makadaghan. Gihimo ko ang tumang pag-amping nga dili masayod si Bob sa relasyon namo ni Godfrey. Giayo ko’g bahin ang akong panahon alang nilang duha. -- Sumpayan pa