Ang gipangalaan ni Lusing

Hilaw pa man ni, Day Lusing!” Nagkanayon si Alex samtang mipislit sa bunga sa kaymito nga maoy gitudlo sa iyang asawa. Nia siya karon sa ibabaw sa kahoy’ng kaymito nga namungingi sa daghang mga bunga. Mikatkat siya niini bisan supak sa iyang kabubut-on tungod kay nahadlok siya nga makuhaan unya ang iyang asawa. Tulo ka buwan na nga mabdos si Lusing sa una nilang liwat ug ang hinog nga kaymito maoy gipangalaan niini.

“Sige, pangita na la’g lain, Dong Alex, kay kakan-unon na kaayo ko’g kaymito!” Mibuliskad ang ilong ni Lusing nga naghangad ug mitan-aw kang Alex nga nagkumpayot sa sanga. “Sige ka ... di gani ko nimo pakan-on og hinog nga kaymito ron makuha gyud ning akong gisabak!”

Mikapyot dayon si Alex sa laing sanga ug miirog paingon sa itaas nga bahin sa naasoy’ng kahoy. Unya gipaliraw niya ang iyang mga mata. Mihangad. Miduko. Ug milingi-lingi sa tuo ug sa wala. Ug mipilit ang iyang panan-aw sa nagpungpong nga mga bunga nga nagsinaw gumikan sa kahinog. Layo da kini sa iyang nahimutangan. Dihadiha mihinay-hinay siya’g irog nga nagpanghawid sa sanga aron kuhaon kini. Apan sugo sa dautang kapalaran, nabali ang sanga nga iyang gitungtongan ug nasapli ang sanga nga iyang gunitan. Nahulog dihadiha si Alex nga nagkasangit-sangit sa mga sanga.

Gumikan sa naasoy’ng hitabo, naospital si Alex tungod sa grabing bun-og sa lawas ug nabali sab ang tuo niyang tiil. Ug human sa pipila  ka mga adlaw, nakagawas siya sa ospital nga nagkratsis kay sementado pa man ang nabali niyang tiil nga inagak usab sa pinangga niyang asawa.

Paghimuntog nila sa tugkaran sa ilang balay, kalit nga mihunong si Alex. May naalinggatan siya.

“Nganong gipaputol mo man ang kaymito, Day Lusing?” May sambog nga kasubo ang tingog ni Alex nga nangutana dihang iyang nakita nga punoan na lamang sa kaymito ang nagbarog sa kilid sa ilang balay.

“Akong gipaputol kay naglagot ko ana!” Tubag ni Lusing nga nagpangusmo. “Tungod nianang kahoya, Dong Alex, naputos kita karon sa daghang utang ug hapit ka pa gayud mamatay!”

Milingo-lingo si Alex ug nanghupaw. Unya, “dili gyud unta ko gusto nga putlon kanang kaymitoha, Day Lusing, kay naghambin kana og kasugiran sa atong kinabuhi!”

Nahilom si Lusing human mabati ang mga pulong ni Alex. Unya nahunahuna niya nga tungod sa naasoy’ng kahoy, nagkaila sila si Alex. Nagkahigugmaay. Hangtud nga nagkaminyoay sila.

Taga Mindanao si Lusing. Nahiabot lang siya dinhi sa Sugbo tungod kay nadawat siya sa kompaniya nga iyang giaplayan pinaagi sa internet. Ug sa paghiabot gyud niya dinhi sa Sugbo miabang siya’g usa ka boarding house nga  maoy temporary niyang gipuy-an. Nahimutang ang maong boarding house sa luyo sa balay nila ni Alex.

Usa kadto ka adlaw, samtang naglakaw si Lusing pauli sa iyang gipuy-ang boarding house, nakita siya ni Alex kinsa namupo niadtong higayona sa hinog nga mga bunga sa kaymito ug gihatagan siya. Ug niining higayona nga mabdos na si Lusing sa una nilang anak ni Alex, ang hinog nga bunga sa kaymito mao usab ang gipangalaan ni Lusing.

Gipikpik ni Alex ang mihuyhoy nga abaga ni Lusing.

“Ayaw na lang og hunahunaa kanang kaymitoha, Day Lusing. Buhi pa ang iyang mga gamot busa mosalingsing pa siya ug mamunga inig-labay sa mga katuigan. Sama usab sa atong gugma nga bisan pa man sa mga katalagman nga miabot sa atong kinabuihi nagpabilin gihapon nga lig-on ang atong gugma tungod kay nakagamot na kini’g maayo sa duha nato ka mga kasingkasing!”  Ug misulod silang duha sa balay nga mapahiyomon! (Kataposan)