Maria Magdalena

“Mao pa gyu’y akong pag-abot,” giingnan ko si Bob. “Wa mahibuong ang imong ka-live in nga dugay kang nahiuli?” Nangutana si Bob kay wala ko man siya tug-ani nga atua si Neggar sa Singapore.

“Nangutana siya,” matud ko. “Pero nakakita ko’g katarongan aron di siya magduda,” gibakakan nako si Bob.

“Maayo hinuon kun mao kana,” ni Bob pa. “Ugma magkita na sab ta, ha.”

“Di mahimo.”

“Ug nganong di man?” Nahadlok kang masakpan ta sa imong ka-live in?”

Wala ko makatingog.

“Kinahanglang makigkita ka kanako ugma, Maria,” nagkanayon si Bob. “Di ko modawat og balibad. Paaboton ko ikaw sa SM City, sa alas diyes sa buntag. Ikaw nay mangita’g rason aron makaikyas ka sa inyong balay. Ug wala na magpaabot si Bob sa akong tubag. Giputol na niya ang among panagsulti sa cellphone.

Na-pressure ko sa gibuhat ni Bob. Kun ingon niini kanunay ang paagi sa pag-demand niya sa akong panahon, sa madugay ug sa madali masakpan gyud mi ni Neggar. Ang gihimo ni Bob maayo lang karon nga wala si Neggar sa Sugbo. Maglisod ko paglusot kun mahibalik na si Neggar sa Sugbo ug magkauban na kami kanunay. -- Sumpayan pa