Wala managad

Dear Tita Salie,

Maayong adlaw. Kanunay gyod ko mobasa niining imong column. Gusto sad unta ko nga makaila ka sa personal tungod kay ganahan ko nga makig-amiga nimo. Wala man god ko’y igsuon nga babaye nga puyde nakong kasumbongan mahitungod sa akong problema nga dunay kalabotan ang gugma.

Just call me Patrick, usa ka ulitawo ug nag-eskuyla pa lamang sa college. Anaa ako nagtungha sa UC Banilad.

Dili kalikayan, Tita, nga sa atong pangedaron moagi gyod kita niining uyab-uyab o kalibotan sa mga nagkahigugmaay. Na-inlove ko sa usa ka babaye nga amo ra usab nga silingan. Mora’g ganado kaayo ko, Tita, sa kinabuhi kun ako siyang makit-an ug makauban. Apan luya  ug walay gana ang akong adlaw kun dili nako makit-an ang iyang panagway.

Naguol lang ko, Tita, dihang iya kong gisultian nga dili gusto ang iyang parents nga mag-uyab-uyab siya tungod kay nagtungha pa siya. Sukad niadto akong nabantayan nga mora og naglikay na siya kanako. Usa ka higayon nga nagkasugat mi wala gyod ko niya tagda.

Nahadlok ko, Tita, nga tingali kun makauyab siya’g lain. Kay dili na man siya makigkuyogkuyog kanako. Unsa may akong buhaton? Pasabta ko palihog, Tita. Thank you very much and more power! God bless.

* * *

Hello Patrick,

Klaro man kaayo ang gisulti sa imong crush nga dili pa siya mosulod sa maong butang kay maoy iyang unahon ang iyang pagtuon, busa wala kay angay kahadlokan nga manguyab o makauyab siya og lain. Ang batasan sa imong crush nagtimaan sa usa ka buotan nga anak. Iya gyod nga gisunod ang tambag sa iyang mga ginikanan. Dili sama sa ubang mga batan-on karon nga igo lang nilang lipaton ug ilaron ang ilang mga ginikanan kun kini dili pa mosugot nga manguyab ang ilang anak. Adunay uban nga bag-o pa lang gani nga nagsugod ang klase apan hinayhinay na nga midako ang tiyan. Ang uban wala maabti og graduation duna nay anak nga kauban.

Busa ayaw kabalaka kay buotan siya. Ug nakaseguro ko nga makahuman gyod siya sa iyang pagtuon kay anaa man kaniya ang determinasyon. Ang imo lamang paaboton mao ang hustong higayon nga andam na siyang modawat og mga manliligaw. Ayaw siya pugsa aron dili ka niya likayan kay esturbo ka sa iyang ambition. Hinuon, pakigsuod lang niyang daan aron imong mailhan ang tinuod niyang batasan.

Ug ayaw kasakit nga dili ka niya tagdon kay tingali naglikay lamang siya sa estorya. -- Tita Salie