Maria Magdalena

Gula 219

Mora ko’g natab-okan sa ulahing gisulti ni Bob. Ingon sa usa kini ka tulisok sa akong pagkatawo. Ingon sa gustong ihulagway ni Bob kanako kun unsa akong matanga sa pagka-babaye. Sakit apan tinuod ang iyang gisulti.

Misurok ang akong dugo sa akong nabati gikan kang Bob. Ingon sa nainsultohan ko sa gisulti niya.

“Hain ka karon magpuyo, Maria, uban sa imong ka-live in?” Nangutana si Bob dihang wala ko magtingog.

“Nganong nangutana ka man niana?” Misumbalik ko’g pangutana.

“Gusto kong makatultol.”

“Nabuang ka na ba?”

“Oo. Ug ikaw ang nakaingon nganong nabuang ko.”

Wala ko makatingog. Nasayod ko kun unsay buot ipasabot ni Bob sa iyang gisulti.

Inanay nga milugdang sa akong reyalisasyon nga makabaton ko’g suliran sa pagpuyo namo ni Neggar kun dili nako mapasabot og maayo si Bob. Kinahanglang makombinser ko siya nga dili na magsamok namo.

“Kun di ko nimo tug-anan kun hain ka magpuyo, Maria,” ni Bob pa. “Di ko ikaw lung-an.”

“U-unsay buot mong ipasabot?” Gisukit ko siya.

“Sundan ko ikaw sa imong pagpauli aron matultolan ko ang dapit nga imong gipuy-an.”

Problema gyung dako! Nakatuaw ko sa hilom. Ug kay naapiki na man ko, napugos ko pagtug-an nga sa Lapulapu City ko nagpuyo uban kang Neggar. -- Sumpayan pa