Ang duha ka anino

Nagping-it ang dagway ni Lisa samtang naghigda sa kama. Nia siya karon sa sulod sa Delivery Room sa usa ka Maternity Hospital. Hapit na siya manganak! Sa gawas sa Delivery Room, nag-alindasay si Fredo –bana ni Lisa.

Naglibog siya kung unsay iyang buhaton ilabi na nga una pa lang kining pagpanganak sa iyang asawa. Giharian siya karon sa kakulba ug kahinam.

Gikan pa sa siyudad sa Sugbo si Fredo ug mituyo gayud sa pagpauli dinhi sa probinsiya aron abagan ang iyang asawa ning iyang pagpanganak. Nagtrabaho siya sa dakong kompaniya nga nahimutang sa siyudad sa Sugbo isip supervisor ug panagsa lamang siya mopauli gumikan sa kadako sa magastong pamasahe.

Samtang naglingkod siya sa taas nga lingkoranan nga nahimutang sa gawas sa Delivery Room, may nasigpatan siyang usa ka lalaki nga paspas kaayong miduol sa siradong pultahan sa nahisgotang lawak. Nailhan dayon niya kini.

“Kumusta ka na man. Bay Mar?” ni Fredo pa dayong tunol sa binukhad niyang palad kang Mar. Suod niyang higala si Mar. Gani, kanunay gayud niya kining ikauban ug ikainom sa ilang balay matag pauli niya gikan sa siyudad. Klasmet niya si Mar kaniadto gikan sa elementarya ug hangtod na sa hayskol.

Nakalitan si Mar ug wala dayon makatingog dihang nakita niini si Fredo. Unya, “Ma ... Maayo man, Bay Fred!” Ni Mar pa dayong dawat sa kamot ni Fredo. Ug naglamanohay sila.

“Nganong buot ka mang mosulod sa delivery room, Bay Mar, naa ba usab sa sulod ang imong asawa?” Sukna ni Fredo kinsa gibati og kahibulong ning pagbutho ni Mar.

Kalit miabli ang pultahan sa Delivery Room ug migawas ang doktor nga maoy miatiman kang Lisa. Miduol dayon si Fredo.

“Kumusta na man si Lisa, Dok?” Si Mar maoy unang nangutana sa doktor.

“Normal ra ang iyang pagpanganak. Ug himsog nga batang lalaki ang iyang gihimugso!” Sa doktor pa dayong lakang palayo sa duruha. Milakaw usab dayon si Mar nga nagngisi nga wala gani manamilit. Gitan-aw siya ni Fredo. Unya, may nahinumdoman si Fredo samtang nagsud-ong kang Mar nga mipalayo. Nahinumdom siya niadtong gabii nga nag-inom sila si Mar sa sala sa ilang balay. Tungod sa tumang kahubog nakatulog siya sa sopa. Sa iyang pagmata nianang pagka kaadlawon, may nakita siyang duha ka anino nga nadan-agan sa saag nga kahayag gikan sa gawas sa ilang balay. Unya mipalayo ang usa ka anino ug nahanaw sa kangitngit. Pagkatapos, misiga ang sugang dagitabnon ug nakita niya si Lisa nga miduol sa iyang nahimutangan nga nagtapis og tualya. Gibira siya ni Lisa ug giagak paingon sa sulod sa ilang lawak!

“Si Mar tingali kadtong usa sa duha ka anino nga akong nakita. Salbahis ka, Mar!” Ni Fredo pa sa mga pulong nga diha lamang moulbo sa ilawom sa iyang dughan! (Kataposan)