Pahiyom ni Catherine - Gula 3

Pagkagabii, gikuha g’yud ni Nestor si Catherine didto sa iyang gitrabahoan. Nangaon sila sa usa ka restaurant  ug nagsultihanay sulod sa mga tunga sa oras. Nakapasamot kini sa ilang panagsuod. “Mopauli na ko Nestor,” matud ni Catherine dayong tindog sa iyang gilingkoran.

Gihatud ni Nestor si Catherine didto sa iyang gipuy-an. “Sayon ra man diay tultolon kining imong gipuy-an Cath. Mobalik unya ko dinhi kun mag-day off ka sa imong work kay makalugar man ko kay gabii pa man ang akong duty,” matud ni Nestor.

“Welcome ka g’yud kaayo Nestor. Saturday man ang akong day off gud,” matud ni Catherine nga nagpahiyom ug nagpasabot nga ikalipay niya kun mobisita kaniya ang ulitawo. Wala na magdugay si Nestor sa paghatud niya ni Catherine.

Gikahinangop ni Nestor ang ilang panagsuod na pag-ayo ni Catherine. Milabay pa ang mga adlaw ug miabot ang Sabado. Gusto ni Nestor nga ikauban niya si Catherine tibuok adlaw nga wala kini trabaho.

Mihapit usa si Nestor sa downtown area ug gipalitan niya’g makaon si Catherine. Nagtoo si Nestor nga gusto kaayo nga mokaon og cake ang dalaga. Dayon misakay og taksi si Nestor paingon sa gipuy-an sa dalaga.

Gituyo ni Nestor nga wala niya pahibaw-a si Catherine nga mobisita siya karong adlawa. Didto gipahunong ni Nestor ang taksi nga iyang gisakyan sa distansya og gamay sa gipuy-an ni Catherine ug naglakaw ra siya paingon sa gate.

Gipindot ni Nestor ang door bell ug abtik kaayo siya nga mipahipi sa kilid sa pultahan. Taud-taud, miabli ang pultahan ug mili-li si Catherine. “Uy, ikaw man diay kini Nestor!” nagngisi si Catherine nga nakakita sa ulitawo.

Misulod si Nestor ug dayon gisirad-an ni Catherine ang gate. “Mora’g mingaw lagi Cath,” giingnan ni Nestor ang dalaga. Matud ni Catherine nga siya ra ug ang tag-iya sa balay nga tua nagpuyo sa unahan og gamay ang nahabilin kay nagtrabaho ang uban nila nga ka-board mate.

“Maayo hinoon nga miabot ka Nestor kay mingaw kaayo nga ako ra usa ang dia sa balay,” matud ni Catherine. Gitunol ni Nestor ang gibitbit niya nga plastic bag nga gisudlan sa gipalit niya nga cake.

“Ka sweet g’yud nimo Nestor uy,” matud ni Catherine. - Sumpayan