Maria Magdalena - Gula 215

“Gusto kong moadto sa inyong lugar, Maria,” ni Neggar pa.

Wala ko makatingog.

Ang tinuod, dili ko gustong moadto si Neggar sa among dapit didto sa Barili. Nabalaka ko nga magkakita sila ni Bob. Nagtuo kong wala pa makadawat si Bob sa akong gibuhat niya. Nahadlok kong si Neggar ang pahimungtan sa higayon nga magkita sila.

“Kanus-a man kaha ang nindot nga isuroy sa inyong lugar, Maria? Gikan ni Neggar. “Mamakasyon ta didto sa Pasko.”

“Depende,” mao ray akong natubag.

“U-unsay depende?”

“Kun ganahan kong mobakasyon. Sa pagkakaron gud, wa pa ko’y planong mobakasyon sa amoa. Mas gusto ko dinhi sa Lapulapu. Total bag-o pa man miari silang Papa ug Mama.”

Nakamatikod ko nga gitutokan ko ni Neggar.

“Nganong magdumili man ka pagpakuyog nako, Maria, wa ka bay gitago nako?” Nangutana siya pagkataudtaod.

“Nga-nganong nakapangutana ka’g ingon niana?” Misumbalik ko’g pangutana niya.

“Ayaw lang laina pagsabot ang akong pangutana. Nahibulong lang ko. Nakamatikod ko nga mora’g wa kay gustong moadto ko sa inyong dapit.”

“Sa gikaingon ko na kanimo sukad pa kaniadto, wa koy gililong nimo, Neggar. Ayaw lang laina pagsabot ang akong gisulti. Aw, kun gusto ka gyud nga moadto sa Barili sa among balay -- mahimo man nga moadto ka. Ipakuha lang tika ni Papa. -- Sumpayan pa