Ang alibangbang sulod sa bupete
Andam na si Atty. Steve Bugat karong buntaga alang sa bista. Nia na ibabaw sa iyang lamesa ang folder sa kaso nga may tatak “Simeon Miro versus Olga Malos.†Nia na sab gipatong ibabaw sa folder ang iyang talaadlawan. Nia sab ibabaw sa diary iyang antiyohos nga itom og sudlanan. Gahi ug lig-on ang sudlanan sa iyang antiyohos. Dili mayupi bisa’g malingkuran o mayatakan kun mahulog.
Kasamtangan naghukas siya sa iyang t-shirt. Aron pulihan og barong. Naa ra man siya’y mga barong gi-hanger luyo sa aparador sa iyang mga libro.
Igo gyud siyang nakahuman og sul-ob og barong, may naglupad-lupad ubos og diyutay sa kisame sa iyang bupete. “Uy! Nganong nakasulod man ning langgama?†tuaw niya sa hilom. Abi niya og langgam sa una, daklit ug kalit nga tan-aw. Apan dihang gitataw niya, alibangbang diay ang naglupadlupad.
Dako ug mabulokon ang alibangbang. Daw tunga sa palad ni Steve ang gidak-on sa usa ka pako niini. Nagmapamapa ug nagpintikpintik sa iyang mga pako ang nagkadaiyang bulok. May lunhaw, asul, lalag, puti ug dunay diyutay’ng pula. Nahinumdom siya sa mga bulok sa kasagarang bistida nga isul-ob sa iyang kliyente. “Giunsa man kaha pagsulod ining kabakabaa? Wa may buslot akong opisina? Sirado tanang bintana, kay aircon man ni?†sa hunahuna lang niya. Gibati siya’g diyutay’ng kahibulong. Unya nibagting ang telepono ibabaw sa iyang lamesa.
“Wiliwiliklik! wiliwililik!†Gipunit niya. “Bugat law office†ni Steve. “Attorney, si Glen ni. Anak ni Mrs. Malos. Namatay si mama ganihang kaadlawon. Ipalihug lang una‘g pa-postpone sa bista†sa pikas linya. Laghaw ang tingog. “Ha? Unsa mang hitaboa?†ni Steve. Nangurog ang kaunoran. “Gisul-an siya’s hubak. Nikomplikar. Unya weak man diay siya’g kasingkasing. Nahulog sa “cardiac arrest†ni Glen. “Condolence, dong Glen. Mobisita lang unya ko. Sa pagkakaron, atimanon ko una na’g kaso,†ni Steve.
Nakapanglingo siya pagbutang sa telepono. Nakalitan sa wa damhang balita. Gihangad niya ang alibangbang. Nihana og tugpa sa iyang abaga. Iya untang dakpon.
Apan nilikay. “Nia ba gyud kaha sa kabakaba ang kalag ni Olga?†tuaw niya sa hilom. Di pa siya katuo. Pero iyang giablihan ang pultahan sa bupete. Giabog niya ang insekto. (Kataposan)
- Latest
