Pambata Bola

Gikan sa publikong elementaryang eskuylahan sa siyudad nga iyang gitunghaan, napahunong na usab si Andre sa tungod sa rehas nga koral sa bag-o ug matahom nga balay nga natukod atbang sa eskuwater nga dapit. Gipasiklapan ni Andre ang batang lalake nga katalirungan gyud niya ang pamayhon didto sa sulod nga nagkalingaw na sab og dula sa usa ka bola.

Gipauntol-untol sa batang lalake ang bola. Giitsa-itsa. Hilabihang iboga ni Andre nga nagtan-aw sa bola nga giduladulaan sa batang lalake. Hagbay pa siyang nangindahay nga mapalitan unta siya’g bola sa iyang mama Bella aron iyang duladulaan sa ilang natad sa balay, matag hapon human sa pamuhi sa klase gikan sa ilang eskuylahan, o dili ba, sa matag Sabado ug Domingo nga wa’y klase ang publikong elementaryang eskuylahan.

Maikog man gud siyang magpapalit sa iyang Mama og bola, nga paninda’g siyakoy lang ang panginabuhian sa ilang dapit sa eskuwater, human mamatay ang iyang papa Eboy nga usa ka porter sa usa ka shipping company, gumikan sa hayblad.

“Ssst, sulod diri, Migo! Dula ta’s akong bola!” sangpit sa batang lalake nga padayong nagpauntol-untol sa bola didto sa sulod sa lagwerta sa matahom nga balay, ngadto kang Andre nga nagtindog gihapon sa gate nga rehas.

“Maulaw ko, Migo! Basin kasuk-an ko’s imong Papa ug Mama! Dato ra ba mo, samtang pobre ko!” singgit tubag ni Andre sa mahigalaong batang lalake nga miduol sa gate nga pultahan ug giablihan kini aron pasudlon si Andre.

“Gusto ko’g kadula! Bag-o pa man gud mi nga nagpuyo dinhi!”

“Kinsay ngan nimo! Migo?” sukot ni Andre sa mahigalaong batang lalake.

“Ako si Denver! Eight years old ko! Ikaw, unsay ngan nimo?”

“Si Andre ko! Naa ang among balay diha sa atbang nga eskuwater! Parehas diay ta’g edad, Ver...!”

“Akong sultihan si Papa Henry nga ikaw nay akong kadula dinhi sa among balay, Dre...!”

“Mosugot kaha ang Mama mo, Ver?”

“Biyudo na’s papa Henry, Dre! Duha na ka tuig namatay ang akong Mama sa kanser sa tutoy...!”

“Dili lang usa ko mosulod sa matahom ninyong balay, Ver! Pahulama lang nuon ko’s imong bola bi! Adto lang ko magdula sa among natad...!”

“Sige, dad-a lang ning bolaha, Dre! Ihatag ko lang ni nimo! Kay naa pa man ko’y laing bola! Basta ikaw na ang kadula ko, ha? Sultihan ko lang si Papa Henry nga wala pa moabot gikan sa City Hall nga iyang gitrabahoan...!”

“Yipeee! Salamat, Ver! May bola na gyud ko. Mosugot kaha ang papa mo nga moadto sab ka’s among balay sa eskuwater...?”

“Mosugot, uy! Kay naa man siya’y bag-ong suki og tindera’g siyakoy diha sa eskuwater. Mopalit man si Papa og siyakoy matag buntag...!”

“Ha? Tindera’g siyakoy? Suki diay sila si Mama Bella og siyakoy sa imong Papa...?”

Nangatawa sila si Andre ug Denver. Tungod sa bola, nagkasuod silang duha ug nagkasayranay usab sila si Andre ug Denver nga nagkaila na sab diay ang biyudo ug biyuda nilang amahan ug inahan.

Malipayon nga nanamilit si Andre kang Denver nga nagdala sa bola nga iyang gipauntol-untol paingon sa ilang balay sa eskuwater. (Kataposan)